छठ पर्वलाई लक्षित गर्दै सिर्सिया नदी प्रदूषण नगर्न उद्योगलाई प्रशासनको चेतावनी

बिरगंज, पर्सा, १२ कार्तिक 

बारा । दीपावली तथा छठ पर्वलाई लक्षित गर्दै जिल्ला प्रशासन कार्यालय बाराले सिर्सिया नदीमा प्रदूषण नियन्त्रण गर्न उद्योग तथा औद्योगिक प्रतिष्ठानहरूलाई आग्रह गरेको छ। प्रशासनले नदीमा प्रदूषणजन्य फोहोरमैला तथा विषाक्त रसायन विसर्जन वा प्रवाह नगर्न सार्वजनिक सूचना जारी गर्दै निर्देशनविपरीत कार्य गरे कानुनबमोजिम कारबाही गर्ने चेतावनी दिएको हो।

जीतपुरसिमरा उपमहानगरपालिकाका वडा नं. १, २, ३, ५, ७, ८, ९, १०, २३ र २४ को दक्षिणतर्फबाट बग्ने सिर्सिया नदीमा छठ पर्वका अवसरमा घाट निर्माण गरी स्नान तथा पूजापाठ गर्ने परम्परा छ। धार्मिक आस्था र विश्वाससँग जोडिएको नदीलाई स्वच्छ तथा पवित्र राख्नु सबैको साझा दायित्व भएको प्रशासनले जनाएको छ।

जिल्ला प्रशासन कार्यालयले नदी आसपास सञ्चालनमा रहेका सम्पूर्ण उद्योग तथा औद्योगिक प्रतिष्ठानलाई उद्योगबाट निस्कने प्रदूषणजन्य फोहोरमैला र विषाक्त रसायन नदीमा मिसाउन नदिन आग्रह गरेको छ। साथै, नदी आसपासको क्षेत्रमा सरसफाइ कायम राख्न, फोहोरमैला तथा ढलको उचित व्यवस्थापन गर्न र प्रदूषण नियन्त्रणसम्बन्धी प्रचलित कानुनी व्यवस्थाको पूर्ण पालना गर्न पनि निर्देशन दिइएको छ।

सहायक प्रमुख जिल्ला अधिकारी छविरमण भट्टराईद्वारा जारी सूचनामा निर्देशनविपरीत नदी प्रदूषण गरेको पाइएमा प्रचलित कानुनबमोजिम कारबाही गरिने उल्लेख छ।

छठ पर्वका बेला सिर्सिया नदीमा स्नान तथा पूजापाठ गर्न आउने श्रद्धालु भक्तजनको धार्मिक आस्थालाई ध्यानमा राख्दै नदीलाई स्वच्छ राख्न प्रशासनले उद्योगी, व्यवसायी तथा सम्बन्धित सबै पक्षलाई आग्रह गरेको छ।