कृष्णनगरमा २२ लाख ९२ हजार रुपैयाँभन्दा बढीका यौन सामग्री बरामद

बिरगंज, पर्सा, १३ कार्तिक 

कपिलवस्तु। कपिलवस्तुको कृष्णनगरबाट प्रहरीले २२ लाख ९२ हजार १०० रुपैयाँ मूल्य बराबरका यौन सामग्री बरामद गरेको छ।

कृष्णनगर नगरपालिका–२ स्थित महेन्द्र पार्क नजिकै बेवारिसे अवस्थामा राखिएका ७७६ थान यौन खेलौना र १ हजार ४७६ थान चार्जर प्रहरीले बरामद गरेको हो।

इलाका प्रहरी कार्यालय कृष्णनगरका प्रहरी निरीक्षक कृष्णबहादुर कुँवरको कमान्डमा खटिएको पाँच सदस्यीय प्रहरी टोलीले उक्त सामग्री फेला पारेको प्रहरीले जनाएको छ।

प्रहरी नायब उपरीक्षक रिपेन्द्रकुमार सिंहका अनुसार बरामद सामग्रीमध्ये महिलाले प्रयोग गर्ने ३५६ थान, पुरुषले प्रयोग गर्ने ९९ थान र हरियो रङका ३२१ थान यौन खेलौना रहेका छन्। ती सामग्रीसँगै १ हजार ४७६ थान चार्जरसमेत बरामद गरिएको छ।

प्रहरीका अनुसार बरामद सामग्रीको कुल मूल्य २२ लाख ९२ हजार १०० रुपैयाँ रहेको छ।

इलाका प्रहरी कार्यालय कृष्णनगरबाट करिब डेढ किलोमिटर दूरीमा रहेको स्थानबाट बरामद गरिएका सामग्री आवश्यक अनुसन्धान तथा कानुनी प्रक्रियाका लागि कृष्णनगर भन्सार कार्यालयमा बुझाइएको प्रहरीले जनाएको छ।

घटनामा संलग्न व्यक्ति तथा सामग्रीको स्रोतबारे थप अनुसन्धान भइरहेको इलाका प्रहरी कार्यालय कृष्णनगरले जनाएको छ।