जीतपुरसिमरामा नहरमा पुरुष मृत फेला

बिरगंज, पर्सा, ४ कार्तिक 

बारा । बाराको जीतपुरसिमरा उपमहानगरपालिका–७, जीतपुरस्थित ब्रह्मबाबा चौर नजिकको नहरमा एक पुरुष मृत अवस्थामा फेला परेका छन्।

मृत फेला पर्नेमा स्थानीय ५६ वर्षीय हरिनारायण सहनी रहेका छन्। प्रहरीका अनुसार सहनीका छोरा रामविनय सहनीले बुधबार बिहान करिब ६ बजे नहरमा बुबालाई मृत अवस्थामा देखेका थिए। त्यसपछि उनले शव नहरबाट निकालेर डिलमा राखी बिहान ६ः२० बजे इलाका प्रहरी कार्यालय जीतपुरलाई जानकारी गराएका थिए।

सूचना प्राप्त हुनासाथ प्रहरी वरिष्ठ नायब निरीक्षक उमेश निरौलाको कमान्डमा इलाका प्रहरी कार्यालय जीतपुरबाट पाँच जनाको प्रहरी टोली घटनास्थल पुगेको थियो। घटनास्थल सुरक्षित राखी प्रारम्भिक अनुसन्धान तथा मुचुल्का तयार गर्न इलाका प्रहरी कार्यालय सिमराबाट प्रहरी नायब उपरीक्षक दयाकृष्ण भट्टको कमान्डमा थप प्रहरी टोलीसमेत खटिएको थियो।

प्रहरीले बिहान करिब ८ः१५ बजे घटनास्थलको प्रारम्भिक प्रक्रिया पूरा गरी शव पोस्टमार्टमका लागि प्रादेशिक अस्पताल कलैया पठाएको थियो। पोस्टमार्टमपछि बिहान ११ः२५ बजे मृतकका छोरा विनय सहनीले शव बुझिलिएको प्रहरीले जनाएको छ।

सहनीको मृत्युको कारण खुल्न बाँकी रहेको प्रहरीले जनाएको छ। मृत्युको वास्तविक कारण पोस्टमार्टम रिपोर्ट तथा थप अनुसन्धानपछि खुल्ने बताइएको छ।