बाढीको कहर: धादिङमा ५७ घर बगाउँदा बस्तीमा त्रास

बिरगंज, पर्सा, २५ असोज 

धादिङ । बुढीगण्डकी नदीमा आएको बाढीले धादिङको त्रिपुरासुन्दरी गाउँपालिका–२, आरुघाटस्थित विशालनगर क्षेत्रमा ठूलो क्षति पुर्‍याएको छ।

गाउँपालिकाका अध्यक्ष राजु उप्रेतीका अनुसार बाढीले उक्त क्षेत्रका ५७ घर बगाएको छ। बाढीले धादिङ र गोरखा जोड्ने आरुघाटस्थित मोटरेबल पक्की पुलसमेत बगाएपछि दुई जिल्लाबीचको आवागमन पूर्ण रूपमा विच्छेद भएको छ।

पुल बगाएसँगै गोरखा र धादिङ हुँदै काठमाडौं जोड्ने वैकल्पिक सडक सञ्जालसमेत अवरुद्ध भएको छ। बाढीका कारण स्थानीय बासिन्दा प्रभावित भएका छन् भने सडक तथा पुलमा भएको क्षतिले आवागमनमा थप समस्या सिर्जना गरेको छ।

गाउँपालिकाका अनुसार हालसम्म उक्त क्षेत्रमा मानवीय क्षति भएको विवरण प्राप्त भएको छैन।