दसैंमा नारायणगढ–काठमाडौं सडकमा ठूला मालवाहक सवारी चलाउन रोक

पर्सा , २० असोज 

काठमाडौं । दसैंका बेला यात्रुहरूको सहज आवागमन सुनिश्चित गर्न नारायणगढ–काठमाडौं सडकखण्डमा ट्रेलरलगायत ठूला मालवाहक सवारीसाधन सञ्चालनमा रोक लगाइने भएको छ।

यातायात व्यवस्था विभागमा आज बसेको सरोकारवालाहरूको बैठकले घटस्थापनादेखि पूर्णिमासम्म अर्थात् असोज २५ गतेदेखि कात्तिक ८ गतेसम्म उक्त सडकखण्डमा ठूला मालवाहक सवारीसाधन सञ्चालन गर्न नदिने निर्णय गरेको हो।

दसैंका समयमा यात्रुवाहक सवारीसाधनको चाप अत्यधिक बढ्ने भएकाले सडकमा हुने जाम तथा सम्भावित दुर्घटना न्यूनीकरण गर्ने उद्देश्यले यस्तो व्यवस्था गरिएको विभागले जनाएको छ।

यद्यपि, खाद्य सामग्री, औषधि, फलफूल तथा अन्य अत्यावश्यक वस्तु ढुवानी गर्ने सवारीसाधनलाई भने सञ्चालनमा रोक नलगाइने निर्णय गरिएको छ।

दसैंमा ठूलो संख्यामा यात्रुहरू राजधानी काठमाडौंलगायत विभिन्न गन्तव्यबाट घर फर्किने भएकाले सडकमा सवारीको चाप बढ्ने गर्छ। सोही अवस्थालाई मध्यनजर गर्दै यात्रुवाहक सवारीको आवागमनलाई सहज बनाउन ठूला मालवाहक सवारीमा अस्थायी रोक लगाउने निर्णय गरिएको हो।