.बुढीगण्डकीमा आएको बाढीले गोरखाको सल्लेरी बजार बगायो, जगत बजारमा पनि ठूलो क्षति

बिरगंज, पर्सा, २५ असोज 

गोरखा । गोरखाको चुमनुब्री गाउँपालिकामा बाढीपहिरोले ठूलो क्षति पुर्‍याएको छ। आइतबार बिहान करिब साढे ४ बजे ठूलो आवाजसहित आएको बाढीले चारदेखि पाँचवटा बस्ती प्रभावित भएका छन्।

गाउँपालिका उपाध्यक्ष लक्ष्मी गुरुङका अनुसार बाढीका कारण विद्युत् सेवा अवरुद्ध भएको छ भने खोला वारपार गर्ने पुलहरू बगाएका छन्। नदी किनारका बस्तीमा समेत क्षति पुगेको छ।

बाढी प्रभावित क्षेत्रको अवस्था नाजुक रहेको बताउँदै उपाध्यक्ष गुरुङले क्षतिको विवरण संकलन भइरहेको जानकारी दिएकी छन्। प्रभावित क्षेत्रमा पुगेर स्थलगत अवस्था बुझ्ने र क्षतिको विवरण संकलन गर्ने काम जारी रहेको उनले बताइन्।

यसैबीच, प्रहरी चौकीका असई ऋषिराम यादवका अनुसार बाढीले सल्लेरी बजार बगाएको प्रारम्भिक सूचना आएको छ। त्यस्तै, जगत बजारमा पनि ठूलो क्षति पुगेको खबर प्राप्त भएको उनले बताएका छन्।

बाढीपहिरोका कारण कुन–कुन बस्तीमा कति क्षति पुगेको छ भन्नेबारे विस्तृत विवरण आउन बाँकी छ। मानवीय तथा भौतिक क्षतिको यकिन विवरणसमेत संकलन भइरहेको छ।

प्रभावित क्षेत्रको अवस्था र क्षतिको पूर्ण विवरण प्राप्त भएपछि थप जानकारी आउने अपेक्षा गरिएको छ।