डोल्पा जिल्ला कारागारबाट सुरुङ खनेर ८ कैदी फरार

बिरगंज, पर्सा, १४ कार्तिक 

डोल्पा । डोल्पा जिल्ला कारागारबाट सुरुङ खनेर ८ जना कैदी फरार भएका छन्।

प्रमुख जिल्ला अधिकारी जुनु हमाल ढकालका अनुसार आज बिहान करिब ६ बजे कैदीबन्दीको गणना गर्ने क्रममा संख्या अपुग भएपछि कैदीहरू फरार भएको खुलेको हो।

घटनाबारे जानकारी पाएलगत्तै कारागार प्रशासन तथा सुरक्षा निकायले खोजी र अनुसन्धान सुरु गरेका छन्। हाल कारागारमा रहेका सीसीटीभी फुटेजको अध्ययन भइरहेको प्रमुख जिल्ला अधिकारी हमालले बताएकी छन्।

‘अहिले सीसीटीभी हेरिरहेका छौँ,’ प्रमुख जिल्ला अधिकारी हमालले भनिन्, ‘थप विवरण अध्ययन गर्दैछौँ।’

फरार कैदीहरू कसरी सुरुङ खनेर बाहिर निस्किए, उनीहरू कुन दिशातर्फ भागेका हुन् र घटनामा अन्य कसैको संलग्नता छ वा छैन भन्नेबारे थप विवरण आउन बाँकी छ।

घटनाबारे थप अनुसन्धान भइरहेको र विस्तृत विवरण प्राप्त भएपछि सार्वजनिक गरिने प्रशासनले जनाएको छ।