साइबर सुरक्षा जोखिमपछि नेपालका अधिकांश सरकारी वेबसाइट अस्थायी रूपमा बन्द

बिरगंज, पर्सा, ५ कार्तिक 

काठमाडौं, कात्तिक ५ । प्रोग्रामिङ भाषा पीएचपी (PHP) मा गम्भीर साइबर सुरक्षा कमजोरी फेला परेपछि नेपालका अधिकांश सरकारी वेबसाइटहरू अस्थायी रूपमा बन्द गरिएका छन्। राष्ट्रपति कार्यालय, प्रधानमन्त्री तथा मन्त्रिपरिषद्को कार्यालय, विभिन्न मन्त्रालय, जल तथा मौसम विज्ञान विभागसहित देशभरका स्थानीय तहका वेबसाइटहरू प्रभावित भएको बताइएको छ।

साइबर सुरक्षा कम्पनी विज (Wiz) ले कृत्रिम बुद्धिमत्ता (एआई) प्रविधिको प्रयोगबाट पहिचान गरिएका यी कमजोरीलाई गम्भीर साइबर सुरक्षा जोखिममध्ये एकका रूपमा उल्लेख गरेको समाचारमा जनाइएको छ।

साइबर सुरक्षा निकायहरूले उक्त कमजोरी समाधान गर्न सुरक्षा अपडेट जारी गरिसकेका थिए। तर, समयमै सुरक्षा अपडेट लागू गर्न नसकेका सरकारी तथा अन्य निकायहरूलाई सम्भावित साइबर आक्रमण र संवेदनशील तथ्यांक चोरीको जोखिमबाट जोगिन वेबसाइटहरू अस्थायी रूपमा बन्द राख्न सुझाव दिइएको थियो।

सोही सुझावका आधारमा नेपालका सम्बन्धित प्राविधिक निकायहरूले जोखिम न्यूनीकरणका लागि सरकारी वेबसाइटहरू बन्द गराएको बताइएको छ।

हाल सम्बन्धित निकायहरूले पीएचपीको नयाँ सुरक्षा अपडेट लागू गर्ने प्रक्रिया अघि बढाइरहेका छन्। आवश्यक प्राविधिक तयारी पूरा भएपछि वेबसाइटहरू पुनः सञ्चालनमा आउने अपेक्षा गरिएको छ।

सरकारी वेबसाइटहरू बन्द हुँदा नागरिकले अनलाइनमार्फत प्राप्त गर्दै आएका सरकारी सूचना तथा विभिन्न डिजिटल सेवाहरूमा अस्थायी अवरोध सिर्जना हुन सक्ने देखिएको छ।