तिहार बिदामा पनि खुला रहनेछन् आयल निगमका डिपो, इन्धन आपूर्ति नरोकिने

बिरगंज, पर्सा, २० कार्तिक 

काठमाडौं । तिहार तथा दीपावलीको सार्वजनिक बिदामा पनि नेपाल आयल निगमले पेट्रोलियम पदार्थको आपूर्तिलाई निरन्तरता दिने भएको छ।

चाडपर्वका समयमा उपभोक्तालाई पेट्रोल, डिजेललगायतका पेट्रोलियम पदार्थको अभाव हुन नदिन निगमले सार्वजनिक बिदाका दिनमा समेत विभिन्न स्थानका डिपो तथा प्रादेशिक कार्यालय सञ्चालन गर्ने व्यवस्था मिलाएको हो।

नेपाल आयल निगमका प्रवक्ता मनोजकुमार ठाकुरका अनुसार स्थानीय आवश्यकता र उपभोक्ताको मागलाई ध्यानमा राखेर देशका विभिन्न स्थानमा रहेका डिपो तथा कार्यालय खुला राखिनेछ।

निगमले विराटनगर, अमलेखगन्ज, थानकोट, पोखरा, भैरहवा, सुर्खेत, धनगढी, नेपालगन्ज, दाङ, जनकपुर, चारआली, वीरगन्ज र दिपायलस्थित डिपो तथा प्रादेशिक कार्यालय सञ्चालन गर्ने जनाएको छ।

तिहारलगायतका चाडपर्वमा सवारीसाधनको आवागमन बढ्ने र पेट्रोलियम पदार्थको मागसमेत उच्च हुन सक्ने भएकाले आपूर्ति व्यवस्थालाई सहज बनाउन निगमले यस्तो व्यवस्था गरेको हो।

सार्वजनिक बिदाका कारण इन्धन वितरण प्रभावित नहोस् भन्ने उद्देश्यले आवश्यक व्यवस्थापन गरिएको निगमले जनाएको छ।

यस व्यवस्थाले तिहारको समयमा यात्रा गर्ने सर्वसाधारण, यातायात व्यवसायी तथा अन्य उपभोक्तालाई पेट्रोलियम पदार्थ सहज रूपमा उपलब्ध गराउन सहयोग पुग्ने अपेक्षा गरिएको छ।