काठमाडौं,२४ वैशाख । काठमाडौं उपत्यकासहित देशका अधिकांश क्षेत्रमा जारी वर्षा र बदलीको क्रम अझै करिब दुई सातासम्म कायम रहने मौसमविद्हरूले बताएका छन्। बिहानदेखि सुरु भएको वर्षा पश्चिमदेखि पूर्वसम्म पालैपालो फैलिने सम्भावना रहेको त्रिभुवन विश्वविद्यालय जल तथा मौसम विज्ञान विभागका सहप्राध्यापक विनोद पोखरेलले जानकारी दिएका छन्।

जल तथा मौसम पूर्वानुमान महाशाखाले सार्वजनिक गरेको पछिल्लो मौसमी बुलेटिनअनुसार कम्तीमा शनिबारसम्म देशका विभिन्न क्षेत्रमा वर्षा जारी रहने देखिएको छ। हाल सक्रिय मौसम प्रणाली पश्चिमबाट उत्तर–पूर्वतर्फ सर्दै गइरहेको महाशाखाले जनाएको छ।

आज विशेषगरी लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। उच्च हिमाली क्षेत्रमा हिमपात हुन सक्ने अनुमान गरिएको छ भने अन्य प्रदेशका पहाडी र तराई क्षेत्रका केही स्थानमा पनि वर्षा हुन सक्ने मौसमविद्हरूले बताएका छन्।

पछिल्ला केही दिनदेखि लगातारजसो पानी परिरहेकाले दैनिक जनजीवन प्रभावित हुन थालेको छ। सडक यातायात, कृषि गतिविधि तथा ग्रामीण क्षेत्रमा जोखिम बढ्न सक्ने भन्दै आवश्यक सतर्कता अपनाउन आग्रह गरिएको छ।

यता, प्रि–मनसुन अवधिमा पर्याप्त वर्षा भइरहे पनि यस वर्षको मनसुन भने औसतभन्दा कमजोर रहने अनुमान सार्वजनिक गरिएको छ। दक्षिण एसियाली जलवायु दृष्टिकोण मञ्च (सास्कोफ) को प्रतिवेदनअनुसार नेपालको मध्य क्षेत्रमा मनसुन अवधिमा कम वर्षा र तुलनात्मक रूपमा बढी तापक्रम रहने सम्भावना छ।

मौसमविद्हरूका अनुसार प्रशान्त महासागरमा विकसित एल निनो र हिन्द महासागरमा देखिएको इन्डियन ओसन डाइपोलको प्रभावका कारण मौसम प्रणाली प्रभावित भएको हो। यसले कृषि उत्पादन, खानेपानी तथा जलविद्युत् क्षेत्रमा समेत असर पार्न सक्ने चिन्ता व्यक्त गरिएको छ।

विज्ञहरूले सम्भावित पानी अभावलाई ध्यानमा राख्दै पानी सञ्चय गर्ने, वैकल्पिक बाली छनोट गर्ने र विपद् जोखिम न्यूनीकरणका उपाय अपनाउन सुझाव दिएका छन्।

वीरगन्ज,२४ वैशाख । त्रिभुवन राजपथअन्तर्गत पर्ने वीरगन्जको मुख्य सडक विस्तारको विरोधमा स्थानीय घरधनी र व्यापारीहरूले बिहीबार मानव सांग्लो बनाएर प्रदर्शन गरेका छन्। वीरगन्ज बचाउ संघर्ष समिति तथा वीरगन्ज युवा तथा व्यापारी सडक पीडित संघर्ष समितिको नेतृत्वमा आदर्शनगर चोकदेखि घण्टाघरसम्म स्थानीयहरू सडकमा उत्रिएका हुन्। प्रदर्शनकारीहरूले सडक विस्तारका नाममा भइरहेको संरचना भत्काउने कार्य तत्काल रोक्न सरकारसँग माग गरेका छन्।

सडक विभागले वैशाख ६ र ७ गते वीरगन्ज महानगरपालिकासँगको सहकार्यमा गण्डकदेखि मितेरी पुलसम्मको क्षेत्रमा सडकको दायाँ–बायाँ २५/२५ मिटरभित्र पर्ने संरचनामा डोजर चलाएको थियो। विभागले सडक सीमांकन गरी बाँकी संरचना हटाउन घरधनीलाई सूचना समेत जारी गरिसकेको छ।

यस कदमको विरोध गर्दै स्थानीयले “डोजर आतंक बन्द गर”, “सुकुम्बासी बनाउन पाइँदैन”, “वीरगन्जको मेनरोडलाई सहरी मार्ग कायम गर” लगायतका नाराबाजी गरेका थिए। केही प्रदर्शनकारीले सरकारविरुद्ध पनि चर्को असन्तुष्टि व्यक्त गरेका छन्।

वीरगन्ज बचाउ संघर्ष समितिका संयोजक जवाहर साह कानुले विकासको नाममा स्थानीयलाई विस्थापित गर्ने प्रयास भइरहेको आरोप लगाए। उनका अनुसार वीरगन्जमा पहिले नै वैकल्पिक बाइपास सडक र ६ लेन व्यापारिक मार्ग निर्माण भइसकेकाले मुख्य सडकलाई थप २५ मिटर विस्तार गर्न आवश्यक नरहेको दाबी गरे।

स्थानीयले मेनरोडलाई राष्ट्रिय राजमार्गको सट्टा सहरी मार्गको रूपमा व्यवस्थापन गर्नुपर्ने माग राखेका छन्। माग सम्बोधन नभएसम्म आन्दोलनलाई थप सशक्त बनाउने चेतावनीसमेत उनीहरूले दिएका छन्।

यसअघि वैशाख ११ गते पनि स्थानीय व्यापारी र घरधनीहरूले विरोध प्रदर्शन गर्दै पर्साका प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएका थिए। त्यसपछि आन्दोलनकारीहरूले काठमाडौंको माइतीघर मण्डलामा समेत प्रदर्शन गरेका थिए। सडक डिभिजन कार्यालय हेटौंडाका अनुसार करिब ८ किलोमिटर क्षेत्रमा राष्ट्रिय राजमार्गको मापदण्डअनुसार सडक विस्तार गर्ने क्रममा झण्डै १ हजार २ सय पक्की संरचना प्रभावित भएका छन्।

२४ बैशाख, काठमाडौं । माध्यमिक शिक्षा परीक्षा (एसईई) दिएर नतिजाको व्यग्र प्रतीक्षामा रहेका लाखौँ विद्यार्थीहरूको पर्खाइ अब सकिने भएको छ ।

राष्ट्रिय परीक्षा बोर्डले आगामी वैशाख २९ गतेभित्रै नतिजा सार्वजनिक गर्ने गरी अन्तिम तयारीलाई तीव्रता दिएको छ । परीक्षा नियन्त्रक टुकराज अधिकारीका अनुसार विद्यार्थीहरूको प्राप्ताङ्क प्रणालीमा प्रविष्ट (इन्ट्री) गर्ने कार्य सम्पन्न भइसकेको छ भने बुधबारदेखि विवरणहरू रुजु गर्ने काम धमाधम भइरहेको छ । कुनै प्राविधिक त्रुटी नहोस् भन्नका लागि बोर्डले निकै सतर्कताका साथ तथ्याङ्क रुजु गरिरहेको र निर्धारित समयभित्रै नतिजा निकाल्ने लक्ष्य राखेको छ ।

यस वर्षको एसईई परीक्षालाई विगतको भन्दा फरक र छिटो बनाउन बोर्डले नयाँ रणनीति अपनाएको थियो । गत चैत १९ देखि २९ गतेसम्म सञ्चालन भएको परीक्षामा उत्तरपुस्तिका परीक्षणका लागि केन्द्रमै व्यवस्था मिलाइएको थियो, जसका कारण परीक्षा सकिएको छोटो समयमै नतिजा तयारीको काम अन्तिम चरणमा पुग्न सफल भएको हो । उत्तरपुस्तिका परीक्षण सकिएलगत्तै केन्द्रहरूबाट प्राप्त अंकलाई एकीकृत गर्ने काम सकिएकाले अबको केही दिनमै नतिजा सार्वजनिक हुने सुनिश्चित भएको छ ।

तथ्याङ्क अनुसार यस वर्ष एसईईका लागि देशभरबाट ५ लाख १२ हजार ४२१ जना विद्यार्थीले आवेदन दिएका थिए। जसमा नियमिततर्फ चार लाख ४१ हजार ५६६ र ग्रेड वृद्धिका लागि ७० हजार ८५५ परीक्षार्थी सहभागी छन् ।

छात्रभन्दा छात्राको संख्या बढी रहेको यस पटकको परीक्षामा दुई लाख ५७ हजार ६१३ छात्रा र दुई लाख ५४ हजार ८०१ छात्र सहभागी भएका छन् । बोर्डले नतिजा सार्वजनिक गर्ने अन्तिम मिति नजिकिँदै गर्दा विद्यार्थी र अभिभावकहरूमा उत्साह र कौतूहल दुवै बढेको छ ।

२४ वैशाख,वीरगञ्ज । जिल्ला प्रहरी कार्यालय बाराले अदालतबाट सजाय तोकिएपछि फरार रहेका ११ जना प्रतिवादीलाई पक्राउ गरेको छ।

प्रहरीका अनुसार विभिन्न मुद्दामा दोषी ठहर भई लामो समयदेखि फरार रहेका व्यक्तिहरूलाई विशेष अभियानअन्तर्गत बुधबार पक्राउ गरिएको हो। जिल्ला प्रहरी कार्यालय बाराबाट खटिएको टोलीले जिल्लाका विभिन्न स्थानबाट उनीहरूलाई नियन्त्रणमा लिएको जनाएको छ।

पक्राउ परेकाहरूलाई आवश्यक कानुनी प्रक्रिया पूरा गरी बारा जिल्ला अदालतमा उपस्थित गराइएको निमित्त सूचना अधिकारी तथा प्रहरी निरीक्षक सुरेशराज भट्टले प्रेस विज्ञप्तिमार्फत जानकारी दिएका छन्।

प्रहरीका अनुसार पक्राउ पर्नेहरू वन पैदावार हानिनोक्सानी, चेक अनादर, लेनदेन, कुटपिट अङ्गभङ्ग तथा राजस्व चुहावटजस्ता मुद्दामा संलग्न रहेका छन्। प्रहरीले फरार प्रतिवादीविरुद्धको अभियानलाई निरन्तरता दिने जनाएको छ।