२७ वैशाख, काठमाडौं । रास्वपाले केन्द्रीय शिक्षा विभाग प्रमुखमा मिलन पाण्डेलाई मनोनित गरेको छ ।

आज बसेको पार्टीको सचिवालय बैठकले पाण्डेलाई शिक्षा विभाग प्रमुखमा मनोनयन गरेको प्रवक्ता मनिष झाले जानकारी दिए ।

 

 

 

त्यस्तै स्टार्ट-अप विभागको प्रमुखमा डा प्रभात अधिकारी मनोनित भएका छन् ।
पार्टीको र्‍यापिड एक्सन टिमको केन्द्रीय विभाग प्रमुखमा वैकुण्ठ थापा र उपप्रमुखमा पूर्व डीआईजी विदुर खड्कालाई मनोनयन गरिएको छ ।

२७ वैशाख, काठमाडौं । प्रमुख प्रतिपक्ष दल नेपाली कांग्रेसले मानवीयतालाई ध्यानमा राखेर कार्य गर्न केन्द्रीय सरकारलाई ध्यानाकर्षण गराउनुको साथै आफ्नो नेतृत्वमा सरकार रहेका स्थानीय तहमा प्रभावकारी कार्य गर्ने प्रतिवद्धता गरिएको छ ।

केन्द्रीय नीति अनुसन्धान तथा प्रशिक्षण प्रतिष्ठानले हिजो र आज कैलालीको धनगढीमा गरेको सुदूरपश्चिम प्रदेशस्तरीय अन्तर्क्रियाबाट‍ १५ संकल्प पारित गरेको हो । स्थानीय तहमा कांग्रेसबाट निर्वाचित स्थानमा नागरिकमुखी नीति मार्फत उत्तरदायी र जवाफदेही सरकारको रूपमा थप प्रभावकारी ढङ्गले कार्य गर्ने संकल्प गरिएको छ ।

 

 

 

कानुनको कार्यान्वयनमा मानवीयतालाई केन्द्रमा राखेर काम गर्ने संघीय सरकारलाई समेत ध्यानाकर्षण गराउने संकल्प पारित गरिएको छ ।

कांग्रेसले नेतृत्व गरेका स्थानीय सरकारको नेतृत्चले नीति तथा कार्यक्रम मार्फत स्थानीय तहका सरकारका गतिविधिलाई थप नागरिकमैत्री, सुशासनयुक्त र परिणाममुखी बनाउने प्रतिवद्दता गरिएको छ ।
भूमिहिन दलित, सुकुम्वासी र अव्यबस्थित बसोवासीलाई व्यबस्थापन गर्दा सवैभन्दा पहिला नागरिकको आत्मसम्मानलाई ध्यान दिने प्रतिवद्दता गरिएको छ ।

 

 

 

जोखिम क्षेत्रमा बसोवास गरेका नागरिकको परिवारलाई सुरक्षित स्थानमा पुनर्स्थापना गर्ने गर्नुको साथै मुक्त हलिया, मुक्त कमैया, वादी समुदाय लगायतका लागि जीविकोपार्जनका लागि विशेष प्राथमिकताका कार्यक्रम संचालन गर्ने संकल्प गरिएको छ ।

स्थानीय सरकारबाटहुने सार्वजनिक सेवाप्रवाह थप सरलिकृत गर्ने संकल्प गरिएको छ । एक स्थानीय तहले गरेका असल अभ्यासलाई अन्य स्थानीय तहमा समेत ग्रहण गर्ने निर्णय गरिएको छ ।
संवैधानिक ब्यवस्था अनुसार असार १० गतेभित्र स्थानीय तहले अनिवार्य रूपमा बजेट पेश गर्न प्रतिवद्दता गरिएको छ ।

संकल्पको पूर्ण पाठः

सुदुरपश्चिम संकल्प
नेपाली कांग्रेसले परिकल्पना गरेको समुन्नत नेपालको प्रमुख आधार नै गाउँ र नगरको समुन्नति हो। संविधानत: जनताका प्रत्यक्ष सरोकारका विषयहरूमा तत्काल सेवा प्रवाहगर्ने जिम्मेवारी जनताको घर-आगनमा रहेको स्थानीय सरकारलाई भएको कुरालाई हृदयङगम गर्दै,
नेपालको संविधान, स्थानीय सरकार संचालन ऐन, नेपाली कांग्रेस पार्टीको संकल्प र प्रतिज्ञा, सुशासनका मापदण्ड र जनताप्रतिको उत्तरदायीत्व र जवाफदेहीतालाई पुर्ण रुपमा आत्मसात गर्दै नेपाली कांग्रेसले नेतृत्व गरेका स्थानीय सरकारको नेतृत्चले नीति तथा कार्यक्रम मार्फत स्थानीय तहका सरकारका गतिविधिलाई थप नागरिकमैत्री, सुशासनयुक्त र परिणाममुखी बनाउन प्रतिवद्ध रहदैँ,
नेपाली कांग्रेस, केन्द्रीय नीति अनुसन्धान तथा प्रशिक्षण प्रतिष्ठानको आयोजनामा २०८३ वैशाख २६ र २७ गते सुदुरपश्चिमको धनगढीमा भएको सुदुरपश्चिम प्रदेशस्तरीय स्थानीय सरकारका जनप्रतिनिधि तथा पार्टीका स्थानीय र जिल्ला तहका नेतृत्वबीचमा भएको संवाद, विषयगत छलफल र विस्तृत अन्तरक्रियाको आधारमा सुदुरपश्चिमका स्थानीय सरकारको नेतृत्व र पार्टीको नेतृत्व यो भेलाले निम्न १५ संकल्प गर्दछ।
संकल्पहरू
१. संविधानप्रदत्त नागरिकको स्वतन्त्रता र अधिकारलाई संरक्षण गर्दै नागरिकमुखी नीतिमार्फत उत्तरदायी र जवाफदेही सरकारको रूपमा थप प्रभावकारी ढङ्गले कार्य गर्ने।
२. असल शासन, विधि र जवाफदेहिता एक-अर्काका अभिन्न अंगको रुपमा लिदैं, विधिमा टेकेर मात्र निर्णयहरू गर्ने मान्यतामा दृढ रहँदै, र कानूनको कार्यान्वयन गरिरहँदा मानवियतालाई केन्द्रमा राखेर काम गर्ने कुरामा प्रतिवद्ध रहँदै संघीय सरकारलाई समेत यसतर्फ ध्यानाकर्षण गराउने।
३. स्थानीय सरकारबाट सहज, सुलभ र समय सापेक्ष सेवा पाउनु नागरिकको अधिकार हो भन्ने मान्यता दोहोर्‍याउदै सार्वजनिक सेवाप्रवाह थप सरलिकृत गर्ने। अपाङ्गता भएका व्यक्ति, अशक्त, जेष्ठ नागरिक, गर्भवती, सुत्केरी महिला, दीर्घ रोग भएका नागरिक र विपन्न वस्तिमा घर-आगनमा सेवा दिने प्रयासलाई थप व्यबस्थित र प्रभावकारी बनाउने।
४. स्थानीय सरकार गठन भए पश्चात् भएका जनहितका कार्यहरू र असल अभ्यासलाई श्रव्य दृष्य सामाग्री बनाई नागरिक समक्ष बुँदागत रूपमा सुसूचित स्पष्ट गर्दै अघि बढ्ने। एक स्थानीय तहले गरेका असल अभ्यासलाई अन्य स्थानीय तहमा समेत ग्रहण गर्ने। यो अवधिमा भएका व्यवस्थापकीय कमजोरीहरु पहिचान गरेर त्यसको निदानका लागी ध्यान र प्रयास केन्द्रित गर्ने।
५. संवैधानिक ब्यबस्था अनुरूप असार १० गते भित्र अनिबार्य रूपमा बजेट सभामा पेश गर्न थप प्रतिवद्ध रहँदै नीति तथा कार्यक्रम अनुसार बजेट तर्जुमा गर्ने। योजना तर्जुमा गर्दा अनिवार्य रुपमा सात चरण पुरा गरेर यथार्थपरक, तथ्यमा आधारित र परिणाममुखि बनाउने। खर्चको मापदण्ड बनाई कार्यविधि बमोजिममात्र गर्ने। वित्तिय अनुशासनमा विशेष ध्यान दिने। शुन्य बेरुजु स्थानीय तहका लागि विशेष अग्रसरता लिने।
६. प्रोजेक्ट वैंकमार्फत मात्र योजना तर्जुमा गर्ने कुरालाई कडाइका साथ लागु गर्ने। टुक्रे योजना भन्दा पनि परिणाम आउने किसिमका योजना छनोट गर्ने कुरामा थप प्रतिवद्ध रहने।
७. योजना तर्जुमा गर्दा अनिवार्य रुपमा स्थानीय पार्टी समिति, आम नागरिक, नागरिक समाज, विभिन्न विषयका विज्ञसंग समेत संवाद र परामर्श गर्ने र सुझाबलाई आत्मसात गर्ने। पार्टी सरकार समन्वय संयन्त्रलाई प्रभावकारी बनाउन हरेक २ महिनामा नियमित संवाद गर्ने।
८. जनताको करबाट उठेको राजस्वलाई अनुत्पादक क्षेत्रमा लगानी नगर्ने कुरमा दृढ रहने। निर्दिष्ट योजना र विनियोजित स्रोत सीमा वाहिर गइ अपारदर्शी वा अनुत्तरदायी रुपमा हचुवाका भरमा कुनै पनि निर्णय वा काम नगर्ने,गर्न नदिने। सार्वजनिक सेवा र नागरिक हितको आधारमा कर र उद्यम व्यवसाय मैत्री कर प्रणाली लागु गर्ने।
९. रोजगार वैंक, उद्यम विकास केन्द्र तथा उद्यम मेला मार्फत उद्यम र रोजगारीको वातावरण बनाउने। स्थानीय कच्चा पदार्थको प्रयोग, रोजगारी सिर्जनालाई कर सहुलियत दिने व्यबस्था लागु गर्ने। उत्पादनशील क्षेत्र र उद्यममा महिलाको सहभागिता अभिवृद्धी तथा स्वरोजगार सुनिश्चित गर्न तथा महिलाको परम्परागत सीप ज्ञानलई उद्यमसंग जोड्न “उद्यमी आमा” जस्ता कार्यक्रम संचालन गर्ने। वैदेशिक रोजगारबाट फर्केका व्यक्तिको सिप उपयोगगरी उद्यम संचालन गर्न ‘श्रमदेखि उद्यमसम्म कार्यक्रम संचालन गर्ने।
१०. नागरिको मौलिक हकको रुपमा रहेको शिक्षा, स्वास्थ्य, खानेपानी लगायतका आधारभूत विषयमा स्थानीय तहको महत्वपूर्ण जिम्मेवारी रहेको छ। सशर्त र संघीय कार्यक्रममा सिमित नभै शिक्षा र स्वास्थ्यमा आन्तरिक लगानीमा प्राथमिकता दिई गुणस्तरीय शिक्षा सुधारका सिर्जनात्मक कार्यक्रम र स्वास्थ्य सेवालाई विशेष प्राथमिकतामा राख्दै सवैलाई स्वास्थ्य बिमा, घरमै सेवा मार्फत नागरिकको स्वास्थ्यको विशेष ख्याल राख्ने। सुदुरपश्चिम क्षेत्रका पर्यटकीय स्थलको प्रवर्द्धन गर्दै प्रदेश समुन्नतिसंग जोड्न साझा पहलकदमी लिने। कला र खेलकुदमार्फत युवा पुस्तालाई जोड्ने।
११. सुदुरपश्चिम प्रदेशभित्र बसोवास गरिरहेका भूमिहीन दलित, सुकुम्वासी र अब्यबस्थित बसोवासीको कानून बमोजिम समस्या समाधान गर्न लगत संकलन, प्रमाणीकरण, जग्गा नापी र पूर्जा वितरण लगायतका कार्यका लागि पहलकदमी लिने। भूमिहिन दलित, सुकुम्वासी र अव्यबस्थित बसोवासीलाई व्यबस्थापन गर्दा सवैभन्दा पहिला नागरिकको आत्मसम्मानलाई ध्यान दिई जोखिम क्षेत्रमा बसोवास गरेका नागरिकको परिवारलाई सुरक्षित स्थानमा पुनर्स्थापना गर्ने। मूक्त हलिया, मुक्त कमैया, वादी समुदाय लगायतका लागि जीविकोपार्जनका लागि विशेष प्राथमिकताका कार्यक्रम संचालन गर्ने।
१२. जन्मदर्ता, मृत्युदर्ता, स्वास्थ्य विमा दर्ता र नवीकरण लगायतका सेवा “अनलाईन वा आगनबाट” र आधारभूत स्वास्थ्य जाँच घरआगनमै गर्ने ‘घर आगन सेवा संचालनमा ल्याउने। नेपाली कांग्रेसको पहलकदमी र नेतृत्वमा आएको स्वास्थ्य विमा कार्यक्रमलाई प्रभावकारी बनाउन “बिमा ब्राण्डिङ” गर्ने। सिकलसेल एनिमिया, थालसिमिया प्रभावित नागरिक र समुदायमा “सिकलसेल विशेष कार्यक्रम” संचालन गर्ने।
१३. घरेलु तथा महिलामाथि हुने हिंसा, छुवाछुत, जातीय, लैंगिक, सामाजिक विभेद नियन्त्रण, बाल विवाह, छाउपडी, बोक्सी लगायतका सामाजिक कुरिती र अन्धविश्वासको नियन्त्रण र सामाजिक सदभाव तथा समभाव सृजना गर्न नेतृत्वदायी भुमिका निर्वाह गर्ने। धुम्रपान, मध्यपान, लागू पदार्थ दुर्व्यसन जस्ता सामाजिक विकृतिको नियमन र नियन्त्रणलाई प्राथमिकतामा राख्ने। स्थानीय भाषा, लिपी, संस्कृतिको संरक्षण र प्रवर्द्धनको अगुवाई गर्ने।
१४. कानून, योजना र बजेट निर्माणका क्रममा स्थानीय तहसंग समन्वय गर्न तथा कर्मचारी सरुवा छिटो गर्ने र दुर्गममा कर्मचारी खाली हुने अबस्था अन्त्य गर्न प्रदेश र संघ सरकारलाई ध्यानाकर्षण गराउने। संघीयता कार्यान्वयका लागि बाधक रहेका कानून परिमार्जन गर्न, बनाउनुपर्ने कानून बनाउन तथा संघले अनुसूची ९ को साझा अधिकारको बिषयमा स्पष्ट बनाउन संघीय सरकारलाई आग्रह गर्ने।
१५. संघीयता र संविधानको मर्म बमोजिम समन्वय, सहकार्य र सहअस्तित्वको “तीन स” अनुरुप समुन्नतिको मार्गमा अगाडी बढ्न यो भेला संघ र प्रदेश सरकारलाई अपिल गर्दै त्यसमा आफु समर्पित रहने संकल्प गर्दछ।
२०८३ वैशाख २७

२७ वैशाख, काठमाडौं । ‘गर्‍यो भने त सकिने रहेछ नि ।’ माध्यमिक शिक्षा परीक्षा (एसईई) को नतिजा एक महिनाभित्र सार्वजनिक हुने भएपछि अधिकांशले सामाजक सञ्जालमा गरेको टिप्पणी हो यो ।

अघिल्ला वर्षमा नतिजा सार्वजनिक गर्न ३ महिना लाग्ने गरेको थियो । राष्ट्रिय परीक्षा बोर्डको क्यालेन्डरअनुसार असार दोस्रो साता नतिजा सार्वजनिक हुने गरेको थियो ।

 

 

 

तर, बालेन शाह नेतृत्वको सरकार बनेपछि एक महिनामा नतिजा सार्वजनिक गर्ने निर्णय भयो । सोहीअुनुसार बोर्डले २०८२ को एसईई नतिजा अबको दुई दिनभित्र सार्वजनिक गर्ने भएको छ ।

बोर्डले इन्ट्रीको काम सकेर कुनै त्रुटि हुन नदिन रुजुको काम गरिरहेको छ । ‘नतिजा सार्वजनिकको नजिक आइपुगेका छौँ । पर्सिसम्म आउँछ । आईटीले काम गरिरहेको छ,’ परीक्षा नियन्त्रक टुकराज अधिकारीले भने, ‘त्रुटि नहुने गरी नतिजा सार्वजनिक गर्छौं ।’

 

 

 

यस पटक जहाँ परीक्षा, त्यहीँ उत्तरपुस्तिका परीक्षण भएको थियो । जसका कारण एक महिनामा नै नतिजा सम्भव भएको हो । परीक्षा केन्द्रमा नै उत्तरपुस्तिका परीक्षण गरिएकाले छिटो नतिजा सार्वजनिक गर्न सम्भव भएको बताउँछन् नियन्त्रक अधिकारी ।

‘शिक्षक साथीहरूको राम्रो सहभागिता रह्यो । परीक्षा केन्द्रमा नै उत्तरपुस्तिका परीक्षण भयो । रणनीति परिवर्तन हुँदा नतिजा छिटो सार्वजनिक गर्न लागेका हौँ,’ उनले भने ।

आईटीले काम सकेपछि बोर्ड बैठक बोलाउने तयारी छ । बोर्ड बैठक बसेपछि नतिजा सार्वजनिक गरिने छ । ‘आईटीले काम सकियो भनेपछि बोर्ड बैठक बस्छ,’ नियन्त्रक अधिकारीले भने ।

नतिजा समयमा सार्वजनिक गर्नका लागि ३० जनाभन्दा बढी कर्मचारी खटिएका छन् । परीक्षा नियन्त्रण कार्यालयका अनुसार सार्वजनिक बिदाको दिनसमेत कर्मचारीले काम गरेका छन् ।

 

ढिला नतिजा आउँदा विद्यार्थीमा मनोवैज्ञानिक असर पर्नुका साथै ब्रिज कोर्स जस्ता कक्षा सञ्चालन गरेर विद्यार्थीलाई अनावश्यक तनाव दिने गरेको गुनासो आउने गरेको थियो ।

विद्यार्थीलाई मनोवैज्ञानिक तनाव नदिन एक महिनामा नतिजा सार्वजनिक गर्ने निर्णय गरेको शिक्षा मन्त्री सस्मित पोखरेलले बताउँदै आएका छन् । सरकारले एसईईपछिको ब्रिज कोर्सका कार्यक्रम सञ्चालनमा पनि रोक लगाएको छ ।

विद्यार्थीको रुचिअनुसार कसैले खेलकुद, कसैले म्युजिक सिकुन् भन्ने उद्देश्य सरकारको हो । नतिजाको लागि ३ महिना कुर्नुपर्ने बाध्यता हटेकोमा शिक्षक र विद्यार्थी उत्साहित देखिएका छन् ।

‘विद्यार्थीले नतिजाको लागि धेरै समय कुर्नु परेन । ब्रिज कोर्स पनि जानु परेन । शिक्षक र विद्यार्थी उत्साहित छन्,’ प्रिन्सिपल एसोसिएसनका अध्यक्ष सुदाम गौतमले भने, ‘नतिजा आएपछि कक्षा पनि छिट्टै सञ्चालन गर्नुपर्छ । समयमा नतिजा, समयमा कक्षा भयो भने राम्रो सन्देश जान्छ ।’

एसईई गत चैत १९ देखि २९ सम्म सञ्चालन भयो । परीक्षा सकिएलगत्तै काठमाडौं गोकर्णेश्वरका कृतक पौडेल फ्रेस हुन ट्रेकिङ गए । परीक्षा सकिएको दोस्रो साता उनी गोसाइँकुण्ड ट्रेकिङ गएका हुन् ।

‘सरकारले ब्रिज कोर्स पनि हटायो । एसईई सकेलगत्तै पढ्नु परेन । त्यसैले ट्रेकिङ गएको हुँ । तनाव पनि भएन,’ उनले अनुभव सुनाए ।

एसईईको नतिजाका लागि ३ महिना कुर्नु नपर्ने भएकोमा उनी खुसी छन् । ‘पहिला ३ महिना कुर्नुपर्थ्यो । ३ महिना के गरेर बस्ने भन्ने हुन्थ्यो । यस पटक एक महिनामा नतिजा आउने भएपछि समय खेर नजाने भयो । नतिजा आएपछि पढ्न राम्रो हुन्छ,’ उनले भने । नतिजा आएपछि कम्प्युटर विषय पढ्ने कृतकको योजना छ ।

यसै वर्ष एसईई दिएका भक्तपुरका शान न्यौपानेलाई एक महिनामै ‘बोर’ लागिसकेको छ । एसईई सकाएपछि उनले पनि धेरै समय घुमफिरमै बिताए ।

‘एक महिनामै त बोर लागिसक्यो । नतिजा आउन ३ महिना लागेको भए त गाह्रो हुने रहेछ,’ उनले भने, ‘एसईई सकाएपछि भक्तपुर घुमेँ । झापा गएँ । गेम खेलेँ । फिल्म हेरेँ । एसईईमा जस्तो पढ्नु पर्छ भन्ने तनाव भएन ।’

अब विज्ञान विषय पढ्ने तयारीमा छन् उनी । कृतक र शान मात्र होइन, धेरैजसो विद्यार्थी छिटो नतिजा आउन लागेकोमा उत्साहित छन् । यस वर्ष परीक्षाका लागि ५ लाख १२ हजार ४२१ जना विद्यार्थीले फारम भरेका थिए । जसमा नियमिततर्फ चार लाख ४१ हजार ५६६ जनाले र ग्रेड वृद्धितर्फ ७० हजार ८५५ जनाले परीक्षाका लागि फारम भरेका थिए । जसमा दुई लाख ५७ हजार ६१३ छात्रा, दुई लाख ५४ हजार ८०१ छात्र र अन्य ७ जना छन्

 

लिग २ को अंकतालिकामा शीर्ष २ मा रहेका दुई टोली अमेरिका र स्कटल्यान्डसँग नेपालले महत्त्वपूर्ण शृंङ्खला खेल्दै छ । नेपाल ए ले एसोसियटका यी बलिया टोलीलाई हराएकाले सिनियर टोलीमाथि पनि केही दबाब रहनेछ ।

 

.

• नेपाली क्रिकेट टोलीले लिग २ मा अमेरिका र स्कटल्यान्डसँग आगामी २९ वैशाखदेखि घरेलु मैदानमा महत्त्वपूर्ण शृंङ्खला खेल्नेछ।
• नेपाल ए टोलीले अमेरिका र स्कटल्यान्डसँग अभ्यास एकदिवसीय खेल खेल्दै दुवैलाई हराइसकेको छ र सिनियर टोलीमा दबाब बढेको छ।
• इशान पान्डे पहिलोपटक ओडीआई टोलीमा परेका छन् र सहायक प्रशिक्षक वसन्त शाहीले उनको प्रवेशले मिडल अर्डर बलियो हुने बताए।

२७ वैशाख, काठमाडौं । नेपाली क्रिकेट टोलीले गत साता घरेलु मैदानमा लिग २ को एउटा शृंङ्खला खेल्यो । ओमान र यूएईसँगको उक्त शृंङ्खलामा ४ मध्ये ३ खेल नेपालले जितेको छ ।

नेपालले घरेलु मैदानमै फेरि अर्को शृंङ्खला खेल्दै छ । यसपटक भने नेपालले तुलनात्मक रूपमा बलिया टोलीसँग खेल्दै छ । लिग २ को अंकतालिकामा शीर्ष २ मा रहेका दुई टोली अमेरिका र स्कटल्यान्डसँग नेपालले महत्त्वपूर्ण शृंङ्खला खेल्दै छ ।

 

 

 

यसबीचमा नेपाल ए टोलीले भने अमेरिका र स्कटल्यान्डसँग अभ्यास एकदिवसीय खेल खेलेको छ । ए टोलीले दुवै टोलीलाई हराइसकेको पनि छ । यस्तै नेपाल ए टोलीबाट खेलेका इशान पान्डे सिनियर टोलीमा पनि परिसकेका छन् ।

लिग २ को अंकतालिकामा पुछारबाट दोस्रो स्थानमा रहेको नेपालले बलियो अवस्थामा रहेका दुई टोली अमेरिका र स्कटल्यान्डमाथि जित निकाल्न सके सुनमा सुगन्धजस्तै हुनेछ । नेपालले महत्त्वूर्ण अंक हासिल गर्नेछ भने माथि रहेका टोलीलाई हराउँदा शीर्ष ४ को सम्भावना पनि बढ्न सक्छ ।

 

 

 

अर्कोतर्फ, नेपाल ए ले एसोसियटका यी बलिया टोलीलाई हराउँदा सिनियर टोलीमाथि पनि केही दबाब बढ्नेछ । अब खेलाडीहरूले दबाबमा रूपमा लिन्छन् वा प्रेरणाका रूपमा लिन्छन् त्यो भने हेर्न बाँकी छ ।

नेपाली टोलीका सहायक प्रशिक्षक वसन्त शाहीले खेलाडीहरूका लागि चुनौती हुने तर अवसर पनि रहेको बताएका छन् । ‘यसअघि हामी चमत्कारिक प्रदर्शन गरेर ओडीआई रिटेन र विश्वकप छनोट दुवै सिधै गर्‍यौं । अब सधैं चमत्कार पनि हुँदैन’ शाहीले भने, ‘आगामी सबै खेल जित्ने आशा चाहिँ गर्न सकिन्छ । नभएपनि १२ मध्ये कम्तीमा १० खेल जित्ने लक्ष्य राख्नुपर्छ । त्यसका लागि घरेलु सिरिज नै महत्त्वपूर्ण हुन्छ ।’

नेपाल ए को प्रदर्शन, सिनियर टिमलाई चुनौती

 

लिग २ को आगामी शृंङ्खला खेल्न नेपाल आइसकेका अमेरिका र स्कटल्यान्डले नेपाल ए टोलीसँग अभ्यास एकदिवसीय खेलिसकेका छन् । स्कटल्यान्डसँग दुवै अभ्यास खेल नेपाल ए ले जितिसकेको छ भने अमेरिकालाई पनि एक खेलमा हराइसकेको छ र अर्को खेल सोमबार हुँदैछ ।

नेपाल ए टोलीले यसअघि ओमानसँग पनि एकदिवसीय खेलेको थियो जहाँ एक जित र एक हारको नतिजा निकालेको थियो ।

नेपाल ए को टोलीबाट युवा खेलाडीहरूले राम्रो प्रदर्शन गर्दै एसोसियटकै बलिया टोलीविरुद्ध उत्कृष्ट प्रदर्शन गरे । अभ्यास खेल मात्र भएपनि यी खेलले विपक्षीलाई मानसिक रूपमा केही सचेत गराउन भूमिका खेल्ने नेपाल ए का खेलाडीहरूले उल्लेख गर्दै आएका छन् ।

नेपाल ए ले गरेको यो प्रदर्शनबाट सिनियर टिममा पनि एकप्रकारको दबाब बढेको छ । सिनियर टिमले पनि अब जितको नतिजा निकाल्नु पर्ने देखिन्छ । एकतर्फ नेपाल लिग २ मा चुनौतीपूर्ण अवस्थामा छ र यहाँबाट धेरैभन्दा धेरै खेल जित्न आवश्यक छ । त्यसमाथि पनि घरेलु शृङ्खला भएकाले नेपाल धेरैभन्दा धेरै अंक बटुल्न चाहन्छ ।

ए टिमको राम्रो प्रदर्शनबाट मनोवैज्ञानिक रूपले सिनियर टिमलाई केही फाइदा पनि हुने सहायक प्रशिक्षक शाहीले बताए । ‘अब ए टिमसँग हारेपछि उनीहरूको मनोबल केही कम पक्कै भएको छ, त्यहीभएर उनीहरू अलिकति दबाबमा चाहिँ खेल्ने नै छन् । त्यसको फाइदा हामीले लिन सक्नुपर्छ’ शाहीले भनेका छन् ।

‘विपक्षी टोलीले पनि कमब्याक सोचेको हुन्छ । ए टिमसँग हारेर राष्ट्रिय टोलीसँग खेल्दा उनीहरू सतर्क पनि हुन्छन् । टिमले यो कुरालाई कसरी लिन्छ भन्ने कुरा हो, उनीहरूले त्यही कुरामा ध्यान दिए भने उनीहरूलाई पनि फाइदाको कुरा हुन सक्छ’ शाहीले थपे ।

इशानको ‘इन्ट्री’

 

बाँयाहाते ब्याटर इशान पान्डे नेपालको ओडीआई टोलीमा पहिलोपटक परेका छन् ।  इशानले टी-२०आईमा ७ वर्षअघि डेब्यू गरिसकेको भएपनि ओडीआईमा भने मौका पाएकै थिएनन् ।

उनले सन् २०१९ मा नेपालका लागि टी-२०आई डेब्यू गरेका थिए । टी-२०आईमा इशानले नेपालका लागि ४ खेल खेलेका छन् । चारवटै खेल २०१९ मा खेलेका हुन् भने त्यसयता राष्ट्रिय टोलीबाट खेलेका छैनन् ।

इशानले गत संस्करणको जय ट्रफीमा शतकसहितको प्रदर्शन गरेपछि लिग २ का लागि क्याम्पमा परेका थिए । तर त्यसपछि पश्चिम एसियाको युद्धका कारण लिग २ स्थगित भएको थियो ।

यसबीचमा पीएम कप पनि भयो । पीएम कपपछि लिग २ को टोली घोषणा हुँदा भने इशान टोलीमा परेनन् । तर अब भने नेपाल ए बाट पनि राम्रो गर्दै आएका इशान सिनियर राष्ट्रिय टोलीमा परेका हुन् ।

इशानले राष्ट्रिय टोलीबाट खेल्न पाउँदा उत्साहित रहेको बताएका छन् । ‘लामो समयपछि टिममा मौका पाएको छु, आफ्नो बेस्ट दिनेछु । एकदम गाह्रो अवस्थामा टिममा परेको छु, अब राम्रो खेल्नैपर्ने अवस्था छ’ इशानले भनेका छन् ।

नेपालको मिडल अर्डरले राम्रो गर्न नसकिरहेको अवस्थामा इशानको प्रवेशले मिडल अर्डरको प्रदर्शन ब्यालेन्स पनि गर्न सक्छन् । यसका बाबजुद इशानले पार्ट टाइम स्पिन पनि गर्न सक्छन् । बसिरको स्थानमा टिममा आएका इशानको मुख्य जिम्मेवारी भने ब्याटिङमै रहनेछ ।

सहायक प्रशिक्षक शाहीले पनि बाँयाहाते ब्याटर मिडल अर्डरमा हुँदा सशक्त हुने बताए । ‘दुवै टोलीमा लेफ्ट आर्म बलरहरू पनि छन् । हाम्रो मिडल अर्डरमा इशान हुनुले ब्याटिङमा पनि एउटा ब्यालेन्स बनाउँछ । इशानले राम्रो पनि गरिरहेको छ, बलिङ विकल्प पनि रहन्छ’ शाहीले भने ।

पछिल्लो लय र हेड टु हेड

 

लिग २ को अंकतालिकामा अमेरिका र स्कटल्यान्ड शीर्ष २ मा भएका टोलीहरू हुन् । अमेरिकाले २४ खेलमा ३६ अंक जोडेर शीर्षस्थानमा छ भने स्कटल्यान्ड २८ खेलमा ३४ अंकका साथ दोस्रोमा छ ।

नेपालले भने २४ खेलमा १८ अंक मात्र जोडेर सातौं स्थानमा छ । नेपालभन्दा माथि क्यानडाको २४ खेलमा २१ अंक छ भने नामिबियाको २८ खेलमा २२ अंक, नेदरल्यान्ड्सको २४ खेलमा २८ अंक छ । ओमानको २८ खेलमा ३१ अंक छ ।

हेड टु हेडको कुरा गर्दा नेपालले अमेरिकासँग ४ खेल जित्दा ६ खेलमा पराजित भएको छ । एक खेल टाइ भएको छ । घरेलु मैदानमा भएका दुवै खेल नेपालले जितेको छ ।

पछिल्लोपटक कीर्तिपुरमा यी दुई टोली सन् २०२० मा भिडेका थिए जहाँ नेपालले अमेरिकालाई एक खेलमा ३५ रनमै अलआउट समेत गरेको थियो ।

यता स्कटल्यान्डसँग भने नेपालले ५ खेल जित्दा ४ खेलमा पराजित भएको छ । नेपालले स्कटल्यान्डसँग पनि घरेलु मैदानमा भएका दुवै खेल जितेको छ ।

पछिल्लोपटक भने यूएईमा भएको शृंङ्खलामा नेपाल अमेरिकासँग दुवै खेलमा पराजित भएको थियो भने स्कटल्यान्डमा भएको शृंङ्खलामा स्कटल्यान्डसँग १ खेल जित्दा १ खेलमा पराजित भएको थियो ।

***

नेपाल, अमेरिका र स्कटल्यान्डबीचको लिग २ शृंङ्खला आउँदो मंगलबार (२९ वैशाख) देखि सुरु हुँदैछ ।

नेपालले स्कटल्यान्डसँग २९ वैशाखमा खेल्नेछ भने २ जेठमा अमेरिकासँग, ४ जेठमा स्कटल्यान्डसँग अनि ८ जेठमा अमेरिकासँग खेल्नेछ ।

नेपाली टोली : रोहित पौडेल (कप्तान), दीपेन्द्रसिंह ऐरी (उपकप्तान), कुशल भुर्तेल, आसिफ सेख, भीम सार्की, आरिफ शेख, विनोद भण्डारी, इशान पान्डे, नन्दन यादव, गुलशन झा, अर्जुन कुमाल,
सोमपाल कामी, सन्दीप लामिछाने, करण के सी, ललित राजवंशी