पर्सा, २०८२ फागुन २

पर्सा जिल्लामा Gen–Z अभियानलाई थप सशक्त बनाउने उद्देश्यसहित जगरनाथपुर गाउँपालिकामा २१ सदस्यीय नयाँ कमिटी गठन गरिएको छ। पर्सा Gen–Z को पहलमा सम्पन्न बैठकले स्थानीय तहमा संगठन विस्तार गर्ने निर्णय गर्दै अमर किशोर ठाकुर लोहारको अध्यक्षतामा समिति घोषणा गरेको हो।

बैठकले युवाहरूको सक्रिय सहभागितामार्फत संगठनलाई सुदृढ बनाउने, स्थानीय स्तरमा सामाजिक तथा जनचेतनामूलक कार्यक्रम सञ्चालन गर्ने र Gen–Z अभियानलाई गाउँपालिकाभर विस्तार गर्ने निष्कर्ष निकालेको जनाएको छ। नवगठित समितिमा विभिन्न क्षेत्रका युवाहरूलाई समेट्दै संगठनलाई प्रभावकारी बनाउने लक्ष्य लिइएको छ।

नवगठित २१ सदस्यीय समितिमा हरिओम, मिथुन प्रसाद पटेललगायत अन्य युवाहरू सदस्यका रूपमा रहेका छन्। समितिले आगामी दिनमा युवामुखी कार्यक्रम, सचेतनामूलक अभियान तथा सामाजिक गतिविधि सञ्चालन गर्ने योजना बनाएको जानकारी दिइएको छ।

बैठकमा पर्सा Gen–Z सल्लाहकार अधिवक्ता अनिल शाह, Gen–Z कालिकामाई संयोजक राजनीश कुशवाहा, सुशील पटेल, मधुरञ्जन शाहलगायत युवाहरूको उल्लेखनीय उपस्थिति रहेको थियो। सहभागीहरूले युवाहरूलाई संगठित गर्दै नेतृत्व विकासमा जोड दिनुपर्ने धारणा व्यक्त गरेका थिए।

Gen–Z अभियानलाई जगरनाथपुर क्षेत्रमा विस्तार गर्दै युवाशक्तिलाई संगठित र सक्रिय बनाउने उद्देश्यसहित समिति गठन गरिएको आयोजकले बताएका छन्।

गत सोमबार भन्सार छलीका सामान बरामद गर्न मदन गुप्ताको गोदाममा पुगेको सशस्त्र प्रहरीको टोलीमाथि स्थानीय व्यापारीहरूको एक समूहले आक्रमण गरेको थियो। छापा मार्ने क्रममा सुरु भएको विवाद झडपमा परिणत हुँदा ३ जना सशस्त्र प्रहरी घाइते भएका थिए। घाइते प्रहरीको स्थानीय अस्पतालमा उपचार गरिएको प्रहरीले जनाएको छ।

आक्रमणका क्रममा प्रहरीका दुईवटा सवारीसाधनमा समेत तोडफोड गरी क्षति पुर्‍याइएको थियो। स्थिति नियन्त्रणमा लिन थप सुरक्षाकर्मी परिचालन गर्नुपरेको बताइएको छ।

घटनामा संलग्न भएको आरोपमा पक्राउ पर्नेहरूमा वीरगञ्ज–१० का प्रमोदकुमार कानु र कुञ्जन सर्राफ, वीरगञ्ज–१ का दिपराज सहनी मलाह, विन्दवासिनी–५ का श्रीचन्द्रप्रसाद साह तथा भारतीय नागरिक प्रभु महतो र पृतमकुमार चौधरी रहेका छन्।

जिल्ला प्रहरी कार्यालय पर्साका प्रवक्ता डीएसपी हरिबहादुर बस्नेतका अनुसार पक्राउ परेकाहरूविरुद्ध ज्यान मार्ने उद्योग तथा आपराधिक उपद्रोसम्बन्धी कसुरमा मुद्दा दर्ता गरिएको छ। उनीहरूलाई अनुसन्धानका लागि जिल्ला अदालतबाट ७ दिनको म्याद थप अनुमति लिइएको प्रहरीले जनाएको छ।

सुरक्षा टोलीले गोदामबाट करिब १२ लाख ५० हजार रुपैयाँ बराबरका भन्सार छलीका विभिन्न अवैध सामान बरामद गरेको छ। बरामद सामानको विस्तृत विवरण संकलन गर्ने तथा घटनामा अन्यको संलग्नता रहेको/नरहेको विषयमा अनुसन्धान भइरहेको प्रहरीले जनाएको छ।

यस घटनाले भन्सार छली नियन्त्रण तथा सुरक्षाकर्मीमाथि हुने आक्रमणका विषयमा पुनः गम्भीर प्रश्न उठाएको छ। प्रहरीले कानुन हातमा लिने जोसुकैलाई कानुनी दायरामा ल्याइने स्पष्ट पारेको 

काठमाडौं, फागुन २ – उपेन्द्र यादवले आगामी निर्वाचनमा आफ्नो दलप्रति जनताको आकर्षण उल्लेखनीय रूपमा बढेको दाबी गरेका छन्। जनता समाजवादी पार्टी, नेपाल (जसपा नेपाल) का अध्यक्षसमेत रहेका यादवले विगतको निर्वाचनको तुलनामा यसपटक पार्टीको पक्षमा अनुकूल वातावरण बनेको बताएका हुन्।

शनिबार काठमाडौंमा राष्ट्रिय प्रेस क्लबले आयोजना गरेको कार्यक्रममा बोल्दै उनले पार्टी एकीकरणपछि संगठनात्मक संरचना थप सुदृढ भएको र त्यसको सकारात्मक प्रभाव जनसमर्थनमा देखिएको बताए। “सैद्धान्तिक रूपमा, वैचारिक रूपमा र राष्ट्रिय तथा स्थानीय मुद्दामा हामी स्पष्ट छौं। ती मुद्दा लिएर नै हामी जनताबीच गएका छौं,” उनले भने, “विगतको तुलनामा अहिले जनताको आकर्षण हामीतिर बढेको छ।”

यादवले राजनीतिमा मुद्दा, विचार र सिद्धान्त नै मुख्य आधार हुने उल्लेख गर्दै जसपा नेपालले पहिचान, संघीयता, समावेशिता र सामाजिक न्यायका एजेन्डालाई प्राथमिकतामा राखेको बताए। उनले जनताको दैनिक जीवनसँग जोडिएका राष्ट्रिय तथा स्थानीय मुद्दालाई उठाउँदै समाधानमुखी राजनीति गर्ने प्रतिबद्धता व्यक्त गरे।

उनले लोकतन्त्रलाई परिवर्तनको आधारस्तम्भका रूपमा व्याख्या गर्दै नयाँ पुस्तालाई नेतृत्वमा ल्याउने प्रक्रियामा सबै राजनीतिक दल र नागरिक समाजले सहयोग गर्नुपर्ने धारणा राखे। “देश परिवर्तनका लागि पुस्तान्तरण आवश्यक छ। सक्षम र प्रतिबद्ध युवालाई अवसर दिनुपर्छ,” उनले जोड दिए।

जसपा नेपालले संगठन विस्तार, जनपरिचालन र चुनावी तयारीलाई तीव्र बनाएको उल्लेख गर्दै यादवले आगामी निर्वाचनमा सकारात्मक परिणाम आउने विश्वास व्यक्त गरे।

काठमाडौं। नेपाल प्रहरीका महानिरीक्षक दानबहादुर कार्की ले आगामी निर्वाचनका क्रममा उम्मेदवार तथा राजनीतिक दलका कार्यकर्ताबाट प्रहरीलाई फसाउने प्रयास हुन सक्ने भन्दै मातहत कार्यालयहरूलाई विशेष सतर्कता अपनाउन निर्देशन दिएका छन्।

शुक्रबार बिहान देशभरका प्रहरी कार्यालय प्रमुखहरूसँग गरिएको भर्चुअल निर्देशनमा उनले निर्वाचन सुरक्षामा निर्भीक भएर खटिन र सबै गतिविधिको प्रमाण सुरक्षित राख्दै काम गर्न आदेश दिएका हुन्।

आइजिपी कार्कीले चुनावी प्रचारप्रसारका लागि कुनै पनि सुरक्षाकर्मी परिचालन नगर्न स्पष्ट निर्देशन दिएका छन्। यस्तो कार्यमा संलग्न पाइए कारबाही हुने चेतावनी समेत उनले दिएका छन्।

त्यसैगरी उम्मेदवारको नजिक हुन खोज्ने, संगठनको गोप्य सूचना चुहाउने वा निर्वाचन प्रक्रियामा अनियमितता गर्न खोज्ने प्रहरी कर्मचारीको विवरण छुट्टै अभिलेख राख्न पनि निर्देशन दिइएको छ।

प्रमाण सुरक्षित राख्न विशेष जोड दिँदै उनले अभिलेख, भ्वाइस रेकर्ड, म्यासेज तथा च्याट सुरक्षित राख्न र दैनिक विवरण अद्यावधिक गर्न मातहत निकायलाई निर्देशन दिएका छन्। आवश्यकताअनुसार सादा पोसाकमा समेत प्रहरी परिचालन गर्न सकिने जनाइएको छ।

भर्चुअल बैठकमा सातै प्रदेश प्रहरी कार्यालयका प्रमुख, काठमाडौं उपत्यका प्रहरी कार्यालय, राजमार्ग सुरक्षा तथा ट्राफिक व्यवस्थापन कार्यालय, प्रदेश प्रहरी तालिम केन्द्र, विशेष सुरक्षा गण, जिल्ला प्रहरी परिसर तथा मातहत कार्यालयका प्रमुख र प्रतिनिधिहरूको सहभागिता रहेको प्रहरी प्रधान कार्यालयले जनाएको छ।

प्रहरीका अनुसार निर्वाचन आचारसंहिता उल्लंघन गर्ने तथा अवाञ्छित गतिविधिमा संलग्न व्यक्तिलाई कानुनी दायरामा ल्याउन सूचना संकलनलाई उच्च प्राथमिकतामा राखिनेछ।