काठमाडौँ, । पाकिस्तानको खैबर पख्तुनख्वा प्रान्तस्थित डेरा इस्माइल खान जिल्लामा रहेको करिब २०० वर्ष पुरानो ऐतिहासिक रामलीला मन्दिर भत्काएर सपिङ प्लाजा निर्माण गर्न लागिएको घटनाप्रति विश्व हिन्दु परिषद् नेपालले कडा आपत्ति जनाएको छ।

 

परिषद् अन्तर्गतको मठ-मन्दिर, अर्चक, पुरोहित विभागले एक प्रेस विज्ञप्ति जारी गर्दै उक्त कार्यको घोर भत्सर्ना गरेको हो।

 

विभागका राष्ट्रिय अध्यक्ष दीपक आचार्यद्वारा जारी विज्ञप्तिमा रहिम बजार क्षेत्रमा रहेको उक्त ऐतिहासिक धरोहरलाई भू-माफिया र स्वार्थी समूहको मिलेमतोमा व्यापारिक स्वार्थका लागि ध्वस्त पार्न खोज्नु सांस्कृतिक आतंकवाद र धार्मिक अल्पसङ्ख्यकहरूको अधिकारमाथिको ठाडो प्रहार भएको उल्लेख गरिएको छ।

 

स्थानीय हिन्दु समुदाय र नागरिक समाजका अभियन्ताहरूको तीव्र विरोधपछि हाल स्थानीय प्रशासनले मन्दिर भत्काउने कार्य रोकी उक्त स्थललाई सिल गरेर सरकारी निकाय 'इभाकुई ट्रस्ट प्रपर्टी बोर्ड' (ETPB) को नियन्त्रणमा राखेको छ।

 

तर, यो अस्थायी कदम मात्र भएको भन्दै परिषद्ले दोषीलाई कडा कारबाही र मन्दिरको पूर्ण जीर्णोद्धारको माग गरेको छ।

 

अन्तर्राष्ट्रिय स्तरमा मन्दिरमाथि बढ्दो शृङ्खलाबद्ध प्रहार

 

हालैका वर्षहरूमा विश्वका विभिन्न देशहरूमा हिन्दु मठ-मन्दिर तथा सांस्कृतिक धरोहरहरूमाथि शृङ्खलाबद्ध रूपमा प्रहार भइरहेका घटनाहरू सार्वजनिक भइरहेका छन्।

 

पाकिस्तानमा मात्र नभई छिमेकी राष्ट्र बंगलादेशमा राजनीतिक संक्रमणकालको फाइदा उठाउँदै ऐतिहासिक मन्दिरहरूमा तोडफोड, आगजनी र मूर्तिहरू खण्डित गरिएका अनेकौं तथ्यहरू सार्वजनिक भएका छन्।

 

यति मात्र होइन, पश्चिमा मुलुकहरू जस्तै अस्ट्रेलिया, क्यानडा र संयुक्त राज्य अमेरिका (USA) का विभिन्न सहरहरूमा रहेका प्रख्यात हिन्दु मन्दिरहरूमा समेत अतिवादी समूहहरूद्वारा मध्यरातमा तोडफोड गर्ने र भित्ताहरूमा आपत्तिजनक नाराहरू (Vandalism) लेख्ने क्रम बढ्दो छ।

 

धार्मिक सहिष्णुता र विश्वव्यापी मानवअधिकारको कुरा गर्ने देशहरूमा समेत यस्ता घटना हुनुले विश्वभरका सनातन धर्मावलम्बीहरूलाई चिन्तित बनाएको छ।

 

मन्दिर संरक्षणका लागि विश्वव्यापी ऐक्यबद्धताको आह्वान

 

विश्व हिन्दु परिषद् नेपालका मठ-मन्दिर, अर्चक, पुरोहित विभागका राष्ट्रिय अध्यक्ष दीपक आचार्यले विश्वभर भइरहेका यस्ता निन्दनीय कार्यहरूले धार्मिक स्वतन्त्रताको उपहास गरेको बताउनुभएको छ।

 

"मन्दिरहरू केवल ढुङ्गा र माटोका संरचना मात्र होइनन्, यी त शताब्दीऔं पुरानो इतिहास, संस्कृति र मानव सभ्यताका अमूल्य निधि हुन्," अध्यक्ष आचार्यले भन्नुभयो, "पाकिस्तानमा प्राचीन रामलीला मन्दिरको अस्तित्व नै मेट्न खोज्ने भू-माफिया र दोषी अधिकारीहरूलाई तत्काल कानुनी दायरामा ल्याउनुपर्छ।"

 

विज्ञप्तिमार्फत परिषद्ले पाकिस्तान सरकार, अन्तर्राष्ट्रिय मानवअधिकारवादी संस्थाहरू र संयुक्त राष्ट्रसंघको ध्यानाकर्षण गराउँदै विश्वभरका हिन्दु समुदायलाई धार्मिक सम्पदाको रक्षाका लागि एकताबद्ध भई आवाज बुलन्द गर्न हार्दिक अपिल समेत गरेको छ।

बाँके । बाँकेको राप्तीसोनारी गाउँपालिका–१ सौरीस्थित पूर्व–पश्चिम राजमार्गमा दुईवटा कार एकआपसमा ठोक्किँदा एक जनाको मृत्यु भएको छ भने छ जना घाइते भएका छन्।

 

प्रहरीका अनुसार, ७ गते बिहान करिब ९ बजे कोहलपुरबाट काठमाडौं आउँदै गरेको बा.प्र. ०१–०३२ च ३६१८ नम्बरको कार र दाङको घोराहीबाट नेपालगञ्जतर्फ जाँदै गरेको बा.प्र. ०१–०३० च ८४९६ नम्बरको कार एकआपसमा ठोक्किएका थिए।

 

दुर्घटनामा कोहलपुरबाट काठमाडौं आउँदै गरेको कारमा सवार कैलालीको धनगढी उपमहानगरपालिका–५ घर भई हाल काठमाडौं बस्दै आएका ७३ वर्षीय टेकबहादुर शाही गम्भीर घाइते भएका थिए। उनलाई उपचारका लागि अस्पताल पुर्‍याइएकोमा बिहान १०:०८ बजे चिकित्सकले मृत घोषणा गरेका हुन्।

 

सोही कारमा सवार ४० वर्षीया कुसुम शाही र १६ वर्षीय सुभम शाहीको अवस्था सामान्य रहेको छ। कार चालक डोटीको साविक मुदेगाउँ गाविस–७ घर भएका ४५ वर्षीय नरेन्द्रबहादुर शाही घाइते भएका छन्।

उनको नेपालगञ्जस्थित सञ्जीवनी कलेज अफ मेडिकल साइन्सेज प्रा.लि.मा उपचार भइरहेको छ।

 

त्यस्तै, घोराहीबाट नेपालगञ्जतर्फ जाँदै गरेको अर्को कारमा सवार दाङको घोराही उपमहानगरपालिका–७ निवासी ५५ वर्षीय ओमभक्त योगी, ५५ वर्षीया प्रीति योगी र २३ वर्षीया सुप्रिया गिरी घाइते भएका छन्। उनीहरूको नेपालगञ्जस्थित न्युरो अस्पतालमा उपचार भइरहेको प्रहरीले जनाएको छ।

 

उक्त कारका चालक घोराही उपमहानगरपालिका–७ सौरियार निवासी करिब ४० वर्षीय सम्राट नाथ योगीलाई भने चोटपटक लागेको छैन। उनलाई इलाका प्रहरी कार्यालय कुसुम, बाँकेले नियन्त्रणमा लिएको छ।

दुर्घटनापछि अवरुद्ध भएको पूर्व–पश्चिम राजमार्ग बिहान १०:१५ बजेबाट पूर्ण रूपमा सञ्चालनमा आएको प्रहरीले जनाएको छ।

धनुषामा आपराधिक लाभ र बाल यौन दुरुपयोगको कसुरमा संलग्न चार जना पक्राउ परेका छन्।

 

धनुषामा आपराधिक लाभ लिएको र बाल यौन दुरुपयोगको सूचना पाए पछि खटिएको प्रहरी टोलीले कार्तिक ५ गते बिहान करिब ३ बजे घटनामा संलग्न रहेको आरोपमा चार जनालाई मोटरसाइकलसहित नियन्त्रणमा लिई प्रारम्भिक अनुसन्धान अघि बढाएको हो।

 

प्रहरीका अनुसार आरोपितहरूले पीडितहरूलाई घेरा हाली भिडियो बनाएको, उक्त भिडियो सामाजिक सञ्जालमा सार्वजनिक गरिदिने धम्की दिएको तथा अभिभावकलाई फोन गरी धम्क्याउँदै मोबाइल बैंकिङमार्फत ६ हजार रुपैयाँसमेत स्थानान्तरण गर्न लगाएको प्रारम्भिक अनुसन्धानबाट खुलेको छ।

 

त्यसैगरी, बालिकाको संवेदनशील अंगमा गलत मनसायले छुनेलगायतका हर्कत गरेको आरोपसमेत उनीहरूमाथि लागेको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ। पक्राउ पर्नेहरूमा जनकपुरधाम उपमहानगरपालिका – २० बस्ने २३ वर्षीय सुकन महतो, सोही स्थानका २६ वर्षीय सन्तोष कुमार दास,सोही स्थानका २२ वर्षीय पनेश कुमार महतो र सोही स्थानका ३० वर्षीय सुजित महतो रहेका छन्।

 

प्रहरीले उनीहरूको साथबाट ज १२ प ७७७७ र मधेश प्रदेश ०२–०१ प २९०२ नम्बरका दुईवटा मोटरसाइकलसमेत नियन्त्रणमा लिएको छ। घटनामा संलग्न व्यक्तिहरूमाथि आपराधिक लाभ लिन नहुने तथा बाल यौन दुरुपयोग गर्न नहुनेसम्बन्धी कसुरमा थप अनुसन्धान भइरहेको प्रहरीले जनाएको छ

७ कात्तिक,काठमाण्डाैं । भारतको बिहारस्थित सिवान जिल्लाको आलमपुर गाउँमा पटाका बनाउने तथा भण्डारण गर्ने घरमा भएको शक्तिशाली विस्फोटमा पाँच जनाको मृत्यु भएको छ।

 

 शुक्रबार साँझ करिब ५:३० बजे भएको घटनामा अन्य व्यक्तिसमेत बेपत्ता भएको आशंका गरिएकाले मृतकको संख्या बढ्न सक्ने अधिकारीहरूले बताएका छन्। जामो बजार प्रहरी चौकीको क्षेत्राधिकारमा पर्ने आलमपुर गाउँमा स्थानीय पटाका व्यवसायी मोहम्मद अमीरुद्दीन मियाँको घरमा विस्फोट भएको भारतीय सञ्चारमाध्यमले जनाएका छन्।

 

घरमा राखिएका पटाकामा आगो लागेपछि एकपछि अर्को विस्फोट भएको थियो। विस्फोटको तीव्रताले घरको अगाडिको भाग भत्किएर सडकमा खसेको थियो। घटनास्थलमा करिब डेढदेखि दुई घण्टासम्म पटक–पटक विस्फोट भएका कारण उद्धार कार्यमा समेत कठिनाइ भएको थियो।

 

सिवानका प्रहरी अधीक्षक (एसपी) भरत सोनीले पाँच जनाको मृत्यु भएको पुष्टि गरेका थिए। उनका अनुसार घरमा रहेका भनिएका अन्य तीन जनाको अवस्थाबारे पनि खोजी भइरहेको थियो। जिल्ला प्रशासन र स्वास्थ्य टोलीले घटनास्थलमा शव तथा भग्नावशेषको जाँच गरिरहेका बेला थप शव भेटिन सक्ने आशंका व्यक्त गरिएको छ । 

 

मृतकको आधिकारिक नाम सार्वजनिक भएको विवरण भने स्पष्ट छैन। केही भारतीय सञ्चारमाध्यममा पटाका व्यवसायी अमीरुद्दीन मियाँसहित परिवारका सदस्य र कामदारको मृत्यु भएको उल्लेख गरिए पनि सबै मृतकको पहिचान सम्बन्धित अधिकारीबाट पुष्टि भएको छैन।

 

 विस्फोटका कारण केही शव क्षतविक्षत भएकाले पहिचान गर्न कठिन भएको बताइएको छ। घटनापछि जिल्ला अधिकारी विजय प्रकाश मीना, एसपी सोनीलगायत सुरक्षा तथा प्रशासनिक अधिकारी घटनास्थल पुगेका थिए।

 

दमकल, स्वास्थ्यकर्मी, प्रहरी र फरेन्सिक विज्ञान प्रयोगशाला (एफएसएल) टोली परिचालन गरिएको थियो। विस्फोटको कारण, पटाका भण्डारण तथा उत्पादनको अनुमति र सुरक्षा व्यवस्थाबारे अनुसन्धान अघि बढाइएको छ।

 

घटनामा लापरबाही भएको आशंकामा एसपी सोनीले जामो बजार प्रहरी चौकीका इन्चार्ज र स्थानीय चौकीदार चन्द्रिका माझीलाई तत्काल प्रभावबाट निलम्बन गरेका छन्।

 

 घटनाको अनुसन्धानका लागि महाराजगञ्जका अनुमण्डल प्रहरी पदाधिकारी (एसडीपीओ) को नेतृत्वमा विशेष टोली गठन गरिएको भारतीय सञ्चारमाध्यमले जनाएका छन्।

 

प्रहरीले घटनास्थलको प्रमाण संकलन गरी अनुसन्धान अघि बढाएको छ। मृतकको अन्तिम संख्या, सबैको पहिचान र विस्फोटको वास्तविक कारण भने अनुसन्धानपछि मात्रै स्पष्ट हुने देखिएको छ।एजेन्सीकाे सहयाेगमा