काठमाडौं । अमेरिकाले इरान आसपासको क्षेत्रमा आफ्नो सैन्य उपस्थिति थप विस्तार गर्ने तयारी गरेको छ। अमेरिकी अधिकारीहरूका अनुसार इरान नजिक तीनवटा विमानवाहक युद्धपोत तथा दुईवटा समुद्री सैनिक समूह तैनाथ गर्ने तयारी भइरहेको छ।

अमेरिकी सैन्य गतिविधि विस्तारको तयारी भइरहेका बेला रणनीतिक रूपमा महत्वपूर्ण होर्मुज जलडमरु हुँदै गइरहेको एउटा विशाल तेल ट्यांकरमा अज्ञात वस्तु प्रहार भएपछि आगलागी भएको खबर सार्वजनिक भएको छ। घटनामा कसले र कुन प्रकारको वस्तुले प्रहार गरेको हो भन्नेबारे तत्काल स्पष्ट जानकारी सार्वजनिक भएको छैन।

तीन विमानवाहक युद्धपोत तैनाथ गर्ने तयारी

अमेरिकी अधिकारीहरूका अनुसार इरान आसपासको क्षेत्रमा अमेरिकी नौसेनाको उपस्थिति बढाउने क्रममा तीनवटा विमानवाहक युद्धपोतसहितका सैन्य समूह परिचालन गर्ने तयारी भइरहेको छ।

अमेरिकी नौसेनाको रुजवेल्ट युद्धपोत समूह तथा करिब २ हजार अमेरिकी समुद्री सैनिक सम्मिलित मकिन आइल्यान्ड समूह स्यान डिएगोबाट प्रस्थान गरिसकेको जनाइएको छ।

यी सैन्य समूहहरूको परिचालनसँगै मध्यपूर्व क्षेत्रमा अमेरिकी सैन्य उपस्थिति उल्लेखनीय रूपमा बढ्ने अपेक्षा गरिएको छ। उपलब्ध विवरणअनुसार उक्त सैन्य तैनाथी नोभेम्बरसम्म पूर्ण रूपमा विस्तार हुने बताइएको छ।

अमेरिकी पक्षबाट यस्तो सैन्य परिचालनको उद्देश्य र यसको प्रत्यक्ष लक्ष्यबारे विस्तृत आधिकारिक विवरण भने सार्वजनिक रूपमा स्पष्ट भइसकेको छैन।

होर्मुज जलडमरुमा तेल ट्यांकरमा आगलागी

यसैबीच, विश्वको महत्वपूर्ण तेल आपूर्ति मार्गमध्ये एक मानिने होर्मुज जलडमरु हुँदै गइरहेको एउटा विशाल तेल ट्यांकरमा अज्ञात वस्तु प्रहार भएको र त्यसपछि आगलागी भएको बेलायतको समुद्री व्यापार सञ्चालनसम्बन्धी निकायले जनाएको छ।

घटनाबारे प्रारम्भिक विवरणअनुसार ट्यांकरमा ठूलो मात्रामा कच्चा तेल बोक्ने क्षमता रहेको थियो। उक्त जहाजले करिब २५ लाख ब्यारेलसम्म तेल बोक्न सक्ने क्षमता राख्ने बताइएको छ।

आगलागीपछि जहाजमा भएको क्षति, चालक दलको अवस्थालगायत विषयमा थप विवरण आउन बाँकी रहेको छ। घटनामा प्रयोग भएको वस्तु वा आक्रमणको स्रोत तत्काल पहिचान हुन नसकेको जनाइएको छ।

किन महत्वपूर्ण छ होर्मुज जलडमरु?

होर्मुज जलडमरु मध्यपूर्वबाट विश्व बजारतर्फ तेल तथा अन्य ऊर्जा सामग्री आपूर्ति हुने अत्यन्त महत्वपूर्ण समुद्री मार्ग हो। फारसको खाडी र ओमानको खाडीलाई जोड्ने यो जलमार्गबाट दैनिक ठूलो परिमाणमा तेल तथा पेट्रोलियम पदार्थको ढुवानी हुने गर्छ।

त्यसैले यस क्षेत्रमा हुने कुनै पनि ठूलो सुरक्षा घटना वा समुद्री मार्गमा अवरोध उत्पन्न हुँदा विश्वव्यापी ऊर्जा बजारमा समेत प्रभाव पर्न सक्ने चिन्ता रहने गर्छ।

विशेषगरी इरान र अमेरिकाबीच तनाव बढिरहेको अवस्थामा होर्मुज जलडमरुमा हुने कुनै पनि सुरक्षा घटनालाई अन्तर्राष्ट्रिय समुदायले नजिकबाट नियाल्ने गरेको छ।

क्षेत्रीय तनाव थप बढ्ने संकेत

एकातर्फ अमेरिकाले इरान आसपास आफ्नो नौसैनिक तथा समुद्री सैनिक उपस्थिति बढाउने तयारी गर्नु र अर्कोतर्फ होर्मुज जलडमरुमा तेल ट्यांकरमा आगलागी हुनुका कारण खाडी क्षेत्रमा सुरक्षा चिन्ता बढेको छ।

यद्यपि, यी दुई घटनाबीच प्रत्यक्ष सम्बन्ध रहेको पुष्टि भएको छैन। तेल ट्यांकरमा प्रहार गर्ने व्यक्ति वा समूहको पहिचानसमेत तत्काल सार्वजनिक नभएकाले घटनाको वास्तविक कारणबारे निष्कर्ष निकाल्न अझै थप अनुसन्धान र आधिकारिक विवरण आवश्यक देखिन्छ।

इरान आसपास अमेरिकी सैन्य गतिविधि र होर्मुज जलडमरुमा भएको समुद्री घटनालाई अन्तर्राष्ट्रिय समुदायले नजिकबाट नियालिरहेको छ। आगामी दिनमा अमेरिकी सैन्य तैनाथी, समुद्री सुरक्षा अवस्था र तेल ढुवानी मार्गमा पर्ने प्रभावबारे थप विवरण सार्वजनिक हुने अपेक्षा गरिएको छ।

काठमाडौं । श्रम संस्कृति पार्टीका सांसद आरेन राईले देशका चर्चित हत्या तथा भ्रष्टाचारसम्बन्धी घटनाका फाइल खोलेर दोषीलाई कारबाही गर्न सरकारलाई चुनौती दिएका छन्।

बिहीबार प्रतिनिधिसभाको बैठकमा बोल्दै सांसद राईले गृहमन्त्री सुधन गुरुङको कार्यशैलीमाथि प्रश्न उठाउँदै विगतमा चर्चामा ल्याइएका विभिन्न काण्डका फाइलको अवस्थाबारे जवाफ मागे।

उनले निर्मला पन्त हत्याकाण्ड, दरबार हत्याकाण्ड, गिरी बन्धु टी–स्टेट र वाइडबडी काण्डको फाइल कहाँ पुगेको भन्दै प्रश्न गरे।

“निर्मला पन्त हत्याकाण्ड, दरबार हत्याकाण्ड, गिरी बन्धु टी–स्टेट र वाइडबडी काण्डको फाइल कहाँ पुग्यो ?” राईले प्रश्न गरे, “आज पक्राउ गर्ने र भोलिपल्टै छाड्ने कस्तो सुशासन हो ? के यी काण्डहरू केवल पपुलारिटीका लागि मात्रै बोलिएका थिए ?”

सरकार दुईतिहाइ बहुमतको नजिक रहेको उल्लेख गर्दै उनले भ्रष्टाचारमा संलग्नलाई कारबाही गर्न कुनै बहानाबाजी गर्न नहुने बताए।

भ्रष्टाचारीलाई कारबाही गर्न दुईतिहाइ बहुमत आवश्यक परे आफ्नो पार्टीले सरकार बाहिरै बसेर पनि निःशर्त समर्थन गर्ने उनको भनाइ थियो।

“भ्रष्टहरूलाई कारबाही गर्न दुईतिहाइ चाहिन्छ भने भन्नुहोस्, श्रम संस्कृति पार्टी साथ दिन तयार छ,” उनले भने, “हामीलाई सरकारमा जानु छैन, देश बनाउन र भ्रष्टहरूलाई थुन्न हामी बाहिरैबाट काँध हाल्न तयार छौं।”

राईले विगतका आन्दोलनमा तोडफोड तथा आगजनीका लागि उक्साउनेहरू नै अहिले मन्त्री र सांसद बन्ने, तर आन्दोलनमा सहभागी युवाहरू जेल बस्नुपर्ने अवस्था देखिएको भन्दै सरकारको आलोचना गरे।

उनले भने, “जेन–जी आन्दोलनमा ‘जलाऊ र ठोका’ भन्नेहरू आज सांसद र मन्त्री हुने, तर आन्दोलनमा सहभागी युवाहरू जेल बस्नुपर्ने ?”

बर्खे अधिवेशन अन्त्य हुन लागेको विषय उठाउँदै सांसद राईले संसद् छलेर संघीयता, धर्मनिरपेक्षता, लोकतन्त्र र समावेशितामाथि कुनै पनि किसिमको कुचेष्टा नगर्न सरकारलाई चेतावनी दिए।

सरकारका गतिविधिलाई आफूहरूले नजिकबाट नियालिरहेको बताउँदै उनले आफूहरू सुतेर नबसेको पनि स्पष्ट पारे।

वीरगन्ज,१५असाेज:नेकपा एमालेका नेता एवं पर्साको जगरनाथपुर गाउँपालिकाका पूर्वअध्यक्ष जालिम मियाँका कान्छा छोरा जाफिर मियाँ मन्सुरी पनि पक्राउ परेका छन् । ज्यानसम्बन्धी कसुर तथा सार्वजनिक न्यायविरुद्धको कसुरमा प्रहरीले जाफिरलाई बुधबार वीरगन्जबाट पक्राउ गरेको हो ।

जगरनाथपुर गाउँपालिका–५ मा स्थायी घर भई हाल वीरगन्ज महानगरपालिका–१३ मुर्लीमा बस्दै आएका करिब ४० वर्षीय जाफिरलाई बुधबार दिउँसो पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले जानकारी दिए ।जाफिर भैंसी तथा पाडा व्यापारी हुन् ।

प्रहरीका अनुसार जाफिरमाथि जगरनाथपुर गाउँपालिका–४ घर भएकी आफ्नी सालीको हत्या घटनामा संलग्न रहेको आरोप छ । यसअघि त्यही घटनाकाे अनुसन्धानका क्रममा जाफिरका दाजु नासिर अहमद मन्सुरीलाई पनि प्रहरीले असाेज ३ गते नै पक्राउ गरिसकेको छ । नासिर पनि अहिले प्रहरी हिरासतमै छन् ।

२०७८ साल असाेज २१ गते जालिमका कान्छा छाेरा जाफिर अहमद मन्सुरीकी सालीको शव प्रहरीलाई खबर नै नगरी वीरगन्ज-१३ मुर्लीकाे कब्रस्तान (शमशान घाट)मा दफन गर्ने (गाड्ने) क्रममा प्रहरीले नियन्त्रणमा लिएको थियो ।शव गाड्ने क्रममा नासिर,जाफिर लगायतका व्याक्तिहरु पनि संलग्न रहेकाे आराेप थियाे।त्यसबेला जाफिरकी अविवाहित सालीकाे जबर्जस्ती करणी गरिएपछि अत्याधिक रक्तश्राव भएर सिकिस्त भएपछि गाउँकै क्लिनिकमा उपचारका क्रममा मृत्यु भएको थियाे।त्यसपछि उनकाे शव वीरगन्जको मुर्लीमा ल्याएर गुपचुप रुपमा कब्रस्तानमा गाड्ने प्रयास गरिएको थियाे।

उक्त घटनामा अनुसन्धान अघि बढाउँदै आएको प्रहरीले हत्या आरोपमा करिब पाँच वर्षपछि अहिले जाफिर र नासिरलाई पक्राउ गरेको हो ।

५ वर्ष अघि जालिमकाे राजनीतिक पहुँचको आधारमा प्रहरीले उक्त मुद्दाकाे अनुसन्धान अगाडि नबढाएको आरोप लागेको थियो । प्रहरीले ५ बर्षपछि अहिले आएर मुद्दाको अनुसन्धान अगाडी बढाएकाे हाे।उक्त घटनामा संलगन अन्य आरोपित व्याक्तिहरु फरार रहेको र उनिहरुकाे पनि खाेजी भइरहेको प्रहरीले जनाएको छ।

काठमाडौं, १५ असोज । चिनीको वास्तविक खरिद–बिक्री तथा मौज्दात (स्टक) विवरण स्पष्ट रूपमा उपलब्ध गराउन नसकेको भन्दै सरकारी स्वामित्वको साल्ट ट्रेडिङ कर्पोरेसनलाई ३ लाख रुपैयाँ जरिबाना गरिएको छ।

वाणिज्य, आपूर्ति तथा उपभोक्ता संरक्षण विभागको अनुगमन टोलीले माग गरेको स्टक लेजर उपलब्ध गराउन नसकेपछि कर्पोरेसनलाई उपभोक्ता संरक्षण ऐन, २०७५ बमोजिम जरिबाना गरिएको विभागले जनाएको छ।

विभागका अनुसार स्थलगत रूपमा रहेको चिनीको परिमाण र कर्पोरेसनको अभिलेखमा रहेको विवरणबीच आवश्यक भिडान हुन नसकेको पाइएपछि कारबाही गरिएको हो।

विभागले तोकेको ३ लाख रुपैयाँ जरिबाना हिमालयन बैंकको राजस्व खातामा सात दिनभित्र जम्मा गरी भौचर पेस गर्न कर्पोरेसनलाई निर्देशन दिएको छ। तोकिएको अवधिभित्र जरिबाना रकम नबुझाए थप कारबाही गरिने विभागले चेतावनी दिएको छ।

यस्तै, कारबाहीप्रति असहमति भएमा कानुनी व्यवस्थाअनुसार जरिबाना रकमको ५० प्रतिशत अर्थात् १ लाख ५० हजार रुपैयाँ धरौटी राखी सात दिनभित्र विभागका महानिर्देशकसमक्ष पुनरावलोकनका लागि निवेदन दिन सकिने व्यवस्था रहेको छ।

बजारमा चिनीको अभाव र मूल्यवृद्धिको विषयमा चासो बढिरहेका बेला सरकारी स्वामित्वको संस्थानबाटै चिनीको खरिद–बिक्री तथा मौज्दातसम्बन्धी विवरण स्पष्ट रूपमा प्रस्तुत हुन नसकेको घटनालाई विभागले गम्भीर रूपमा लिएको जनाएको छ।