काठमाडौं । नेपालका लागि अमेरिकी दूतावासकी कार्यवाहक राजदूत मेगन बोल्डिन र अर्थमन्त्री डा. स्वर्णिम वाग्लेबीच भेटवार्ता भएको छ।

आज भएको भेटमा गत अगस्टमा आएको बाढीपछि नेपाललाई अमेरिकाले प्रतिबद्धता जनाएको ३ करोड ६० लाख अमेरिकी डलरभन्दा बढीको सहयोगबारे छलफल भएको हो। बाढीपछिको प्रतिकार्य तथा पुनःस्थापना प्रयासमा अमेरिका नेपाललाई सहयोग गर्ने प्रमुख दातृ मुलुकका रूपमा रहेको छ।

भेटमा कार्यवाहक राजदूत बोल्डिनले नेपालको पुनर्निर्माणमा अमेरिकी कम्पनी तथा प्रविधिले महत्त्वपूर्ण भूमिका खेल्न सक्ने बताउनुभयो। उहाँले मिलेनियम च्यालेन्ज कम्प्याक्ट (एमसीसी) मार्फत नेपालको विद्युत् तथा यातायात प्रणाली सुदृढ हुँदै पुनःस्थापनामा सहयोग पुगिरहेको उल्लेख गर्नुभयो।

त्यसैगरी, विपद् पुनःस्थापनाभन्दा बाहिर नेपालको डिजिटल रूपान्तरणका लागि अमेरिकी प्रविधिको उपयोग र व्यवसायमैत्री नीतिगत सुधार कार्यान्वयन गर्न सके अमेरिकी कम्पनीका लागि नेपालमा लगानी तथा व्यवसायका नयाँ अवसर सिर्जना हुने उहाँले बताउनुभयो।

१९ कातिक,काठमाडौं । निवर्तमान प्रहरी महानिरीक्षक (आईजीपी) दानबहादुर कार्कीले सरकारको निर्णयविरुद्ध सर्वोच्च अदालतमा रिट दायर गरेका छन् ।

आफूलाई गैरकानुनी रूपमा प्रहरी महानिरीक्षक पदबाट हटाइएको दाबी गर्दै कार्कीले पुनर्बहालीको मागसहित कानुन व्यवसायीमार्फत सर्वोच्च अदालतमा रिट दायर गरेका हुन् ।

 सरकारले बुधबार कार्कीलाई प्रहरी महानिरीक्षक पदबाट हटाएर मनोज केसीलाई नयाँ आईजीपी नियुक्त गरेको थियो । सरकारको उक्त निर्णयप्रति असन्तुष्टि जनाउँदै कार्की अदालत पुगेका हुन् ।

 रिट दर्ता भएपछि सर्वोच्च अदालतले यस विषयमा गर्ने सुनुवाइ र आदेशले कार्कीको पुनर्बहालीसम्बन्धी मागको टुंगो लगाउनेछ ।

बारा, कात्तिक १९ –

बाराको जीतपुरसिमरा उपमहानगरपालिकाले सिमरास्थित भूमि व्यवस्थापन शाखाबाट बुधबारदेखि भूमि प्रशासनसम्बन्धी सेवा सुरु गरेको छ।

उपमहानगरपालिकाका अनुसार पहिलो चरणमा जग्गाको स्वामित्व हस्तान्तरणसम्बन्धी लिखत पारित तथा जग्गाधनी प्रमाणपुर्जासम्बन्धी प्रशासनिक काम गरिनेछ। यस्तै, नापीअन्तर्गत फिल्ड रेखाङ्कन, निरीक्षण, नक्सा प्रिन्ट र राजीनामासम्बन्धी नक्सा अद्यावधिक सेवा पनि उपलब्ध हुनेछ।

जग्गा कित्ताकाटका लागि भू–उपयोग नियमावली, २०७९ अनुसार कृषि क्षेत्रमा कम्तीमा ६७५ वर्गमिटर र आवासीय तथा व्यावसायिक क्षेत्रमा कम्तीमा १३० वर्गमिटर जग्गा हुनुपर्ने व्यवस्था गरिएको उपमहानगरपालिकाले जनाएको छ।

नगर क्षेत्रमै सेवा सुरु भएपछि जग्गासम्बन्धी कामका लागि अन्यत्र जानुपर्ने सेवाग्राहीको बाध्यता कम हुने अपेक्षा गरिएको छ। उपमहानगरपालिकाले सम्बन्धित सेवाग्राहीलाई सिमरास्थित भूमि व्यवस्थापन शाखाबाट सेवा लिन आग्रह गरेको छ।

काठमाडौं । प्रहरी महानिरीक्षक (आईजीपी) पदबाट पदमुक्त गरिएका दानबहादुर कार्की सर्वोच्च अदालत पुगेका छन्।

आफूलाई पदबाट हटाउने सरकारको निर्णयविरुद्ध कार्कीले सर्वोच्चमा रिट निवेदन पेस गरेका हुन्। सर्वोच्च अदालत प्रशासन स्रोतका अनुसार रिट दर्ताका लागि पेस भइसकेको छ र दर्ता प्रक्रिया अघि बढिरहेको छ।

सर्वोच्च जाने विषयमा कानुन व्यवसायीहरूसँग परामर्श गरेपछि उनले रिट दर्ताको तयारी गरेका हुन्।

कार्कीले आफूलाई पदबाट हटाउनुअघि स्पष्टीकरण सोध्ने तथा आफ्नो कुरा राख्ने सुनुवाइको अवसरसमेत नदिइएको दाबी गरेका छन्। यही प्रक्रियागत त्रुटिलाई आधार बनाएर उनले सरकारको निर्णयलाई सर्वोच्च अदालतमा चुनौती दिएका हुन्।

रिट दर्ता भएपछि सर्वोच्च अदालतले यस विषयमा गर्ने प्रारम्भिक आदेश र सुनुवाइलाई चासोका साथ हेरिएको छ।